Dia 1 di maart ultimo, Bon Dia Aruba a publica un articulo titula ‘Esfuersonan pa atrae personal den enseñansa y e reto pa haya docente necesario pa para dilanti klas’. Den e articulo en cuestion, fuentenan a informa Bon Dia Aruba cu DPS ta confronta problema pa motibo di maneho di tempo di Gabinete Wever-Croes I y ex-minister Rudy Lampe. Sinembargo, Lampe ta insisti cu e problema no ta ocasiona pa su maneho.

“Minister di Educacion di Aruba tin dos pechi: e ta e directiva di e scolnan publico cu ta cay bao DPS, y e ta responsabel pa e maneho di tur scol cu ta cay bao di diferente directiva di scol. Un minister tin cu atende e interesnan particular di scolnan publico, y na mesun momento e no por perde di bista e conhunto”, Lampe a indica.

Ex-minister Lampe no a baha e presupuesto pa e cantidad di docente na DPS. “Ta incorecto pa bisa mi maneho tabata no reemplasa esun docente cu bay. Tur vacatura di docente ta wordo yena, por averigua cuanto docente nobo a wordo tuma na diferente scolnan di DPS na inicio di e schooljaar aki.

“Tur gobierno rond mundo ta financia innovacion den educacion. Na Aruba nos a pone algún docente ter beschikking di proyecto innovativo. E Prisma proyecto ta anticua, p’esey mi a cuminza cu un scol integral pa muchanan migrante cu ta full digitalisa. Problema di Hulandes ta conta pa nos muchanan Arubiano tambe, p’esey nos a decreta introduccion di Papiamento y di Scol Arubano Multilingual (SAM) na tur scol publico y na un forma acelera, pasobra tur material t’ey. Ta menciona un caso di begeleidingsleerkracht. Cada maestro tin cu bira begeleider y menos docente, esey ta e innovacion di ta mas kindercoach, p’esey a inverti den capacita tur cabezante di scol publico pa ta kindercoach.

“Según análisis estadístico di Directie Onderwijs no tin scarsedad di maestro na Aruba. E problema ta cu scolnan di SKOA tin demasiado maestro pa e cantidad di alumno, segun investigación di Inspectie Onderwijs.

“Mi no a corta gasto riba reemplasante sino a coregi loke no tabata corecto. No tin motibo pa tin lesuitval na scolnan publico, mi maneho tabata garantisa cu semper por zet in un invalleerkracht. Solamente cu no tin fulltime invalleerkrachten mas, pasobra no ta husto pa paga fulltime pa un parttime job. Ta paga e invaller, pensionado of no, según e oranan traha.

“No tin scarsedad pa loke ta maestronan special, loke mester haci ta uso mas eficiente di e recursonan humano. No por sigui cu un maestro pa 4 alumno, e tema di fusie ta wordo menciona tambe den e tussenrapportage di Doorlichting door di Inspectie Onderwijs Hulanda. Placa di pueblo ta sagrado y mester haci bon uso di esey.

“Tin un problema cu merece atencion riba otro nivel, esta cu e ziekteverzuim bao di docentenan ta hopi halto compara cu otro sectornan y compara na nivel di Reino Hulandes. Hopi maestro no kier para mas dilanti klas. Y ta comprendibel, nos sistema tradicional di duna les no ta bay mas. Klassikaal lesgeven necesariamente ta hiba na frustracion. Tussenrapport di Doorlichting di nos sistema di educacion door di Inspectie Onderwijs di Hulanda tambe ta menciona esaki, cu e lesnan ta one way so, docente ta na palabra y alumno ta pasivo pa ricibi informacion. Esaki ya ta anticua. Mester cambia nos manera di duna les, p’esey a bin PEN 2030 cu ta papia di educacion personalisa den e era digital. No educacion klassikaal, sino personalisa.

“Den e era digital no por papia mas di lesuitval. Tur caminda unda scol ta posibel, basta cu tin un celular y ta conecta, e alumno por ricibi instruccion di e docente for di cualkier parti”, Lampe a finalisa.

Nota di redaccion:

Den e articulo di Bon Dia Aruba riba e problema di scarsedad di docente, a referi continuamente na e situacion di scolnan cu ta cay bao DPS. Segun esnan cu a expresa nan preocupacion na nos medio, no ta di awor ta confronta problema cu falta di personal adecuado.

E ta un realidad di ultimo añanan. Locual por reconoce den e reaccion di e ex-Minister ta, cu berdad SKOA por tin demasiado docente pa e cantidad di alumno. Ta de acuerdo cu mester bin renobacion y reforma den enseñansa. Pero logra cambio y innovacion mester di tin cierto condicion na nan lugar. Por ehempel, scol lo mester percura pa e data cu docentenan mester haya acceso na dje, of esey ta bira un responsabilidad personal.