Diaranson ultimo na bispo di Dia di Betico, ex-minister di Husticia, Rudy Croes a presenta su prome buki E Homber’i Pueblo na Biblioteca Nacional Aruba (BNA) su sede principal na Playa.

E acto aki a conta cu presencia di prome minister, Evelyn Wever-Croes y tambe e ministernan Otmar Oduber, Andin Bikker  y Rudy Lampe. Ademas di varios parlamentario y invitadonan.

E linguista di Papiamento, Mirto Lacle kende a fungi como MC a refleha entre otro riba e contenido di e buki E Homber’i Pueblo. E titulo aki ta e nomber politico cu sr. Croes a haya ora cu el a drenta arena politico. Den su obra e ta conta con el a drenta politica pa asunto di destino ora cu nan a confronta e fayecimento di Betico na 1986. Rudy kende tabata un bio- analista trahando den Landslaboratorium, ta relata cu hamas y nunca el a pensa pa drenta politica. Pero na aña 1988, el a wordo convenci pa drenta politica pa medio di partido MEP, unda el a yega di bira parlamentario y minister.

Buki
E buki aki ta dividi den tres parti, y cada parti ti diferente aspecto cu e autor ta relata. E di prome parti titula Respet pa e berdad, e autor ta presenta su vision di e lucha politico di su ruman Betico Croes. El a referi na historia, ideologia y obstaculonan cu Betico a pasa aden pa logra su causa prome cu Status Aparte.

E di dos parti ta dedica na Grupo di Betico cu e aña aki ta celebra 50 aña di existencia. Un grupo cu a cuminsa como un tradicion of celebracion den famia mes, ya cu musica tabata un elemento pa mantene nan uni, y despues el a bira un grupo musical tradicional y popular. E  tempo aya tabata Betico y su Grupo, pero despues di e fayecimento di e estadista aki, el a bira Grupo di Betico. Durante e acto na BNA, Mirto Lacle a conmemora e feliz memoria di Tommy Croes kende a bay laga nos aña pasa. Tabatin un laso di amistad entre nan dos y sr. Lacle a trece algun anecdota ora cu nan a bay studia hunto na Hulanda pa bira maestro di scol.

E di tres parti sub-titula como: ‘For di mi cuna te na mi tumba’, unda entre otro e ta referi na e tragedia nacional relaciona cu e desaparicion di Natalee Holloway. Algun asuntonan cu el a pasa aden riba diferente persona relaciona cu e caso aki, tempo cu e tabata minister di Husticia.

‘Buki blauw no ta completo’
E autor Rudy Croes prome cu a batisa su buki a haci su comentario riba algun preocupacion cu e tin riba uzo di Papiamento, y tambe riba e asina yama Buki Blauw cu ta contene un lista di palabra pa forma parti di ortografia di nos lenga materno. E no a trece esaki como un critica, ya cu e ta contento cu tabatin un grupo cu a produci e buki aki. Pero e ta haya cu e buki blauw no ta completo.

Sr. Croes su observacion ta cu nan a tuma mucho palabra di otro idioma. Den sintesis sr. Croes su ponencia ta cu si tin palabra na Papiamento pakico uza palabra di otro idioma. Ya cu su preocupacion ta cu nos ta core e peliger cu aki 20 aña ‘nos no ta ni conoce nos Papiamento mas’.

El a gradici e miembronan di e comision cu a organisa e presentacion aki y tur esunnan cu a yud’e pa compila e informacionnan cu el a trece den su obra bibliografico. Tambe el a recorda e feliz memoria di e integrantenan di e Grupo di Betico cu ‘tabata t’ey hunto cu nos y no t’ey mas’.

Punto di bista
Considerando cu den su relato historico e buki ta referi na e referendum di dia 25 di maart 1977 y Accionnan di Augustus Scur, e ex-sindicalista, Leo Yarzagaray a elabora riba dje,  durante e presentacion di e buki aki.  El a relata cu e tempo aya, sr. Croes como lider di grupo di Landslaboratorium a firma un mocion pa Aruba lucha pa su autodeterminacion y tambe apoya e referendum.

Tambe sr. Yarzagaray a haci entrega di un peticion formal  na prome minister Wever-Croes pa entre otro puntonan evalua y considera e fecha di e referendum di 1977 hunto cu Augustus Scur nan balor pa nos historia.


Igualmente durante e presentacion aki tanto docente, Candy Dirkz, como docente y actual parlamentario, Sue Ann Ras a trece nan punto di bista riba e buki aki. Sra. Dirkz kende bou guia di fundacion Lanta Papiamento a yega di duna curso di Papiamento entre otro na sr. Croes, el a balua e bon uzo di Papiamento di e buki aki. Mientras cu parlamentario Ras kende a haci e curso e di dos grado di Papiamento, y como docente di Papiamento na Mavo y parlamentario,  a destaca e contribucion cu sr. Croes a haci cu su obra y el a encurasha sr. Croes pa bin cu mas obra.

‘Renacemento di Papiamento’
Bon Dia Aruba a papia cu minister di Enseñansa, sr. Lampe kende a expresa su alegria ya cu e ta sinti cu nos ta ‘bibando un renacemento di Papiamento’. E ta haya cu net den e aña aki cu gobierno a decreta como Aña di Papiamento ta cuminsa den e prome luna cu e presentacion di e buki di sr. Croes na Papiamento tocante entre otro e figura nacional di Betico Croes. Den e contenido di e buki cu e mandatario a wak ariba ariba caba, e ta sinti cu e autor ta ‘enartece e balor di Papiamento di nos comunidad’.

Di su banda directora di BNA, Astrid Britten a expresa na e matutino aki cu e buki E Homber’i Pueblo lo forma parti di nan coleccion nacional,  pero tambe e obra aki ta accesibel pa nan bishitantenan tanto na Playa como na San Nicolas. Sra. Britten ta haya cu e buki aki ta un contribucion valioso pa nos historia pasobra si nos no ta documenta of publica, sigur e generacion nobo cu no a experiencia e periodo ey prome cu Status Aparte, nan no lo sa e parti importante aki di nos historia.