Ministerio Publico mediante un comunicado pa prensa a informa cu Landsrecherche a detene un persona ayera den relacion cu e investigacion di Tulipan.

E ta un homber cu inicialnan G. F. B.

E investigacion Tulipan ta dirigi su mes riba iregularidadnan na Arubahuis den e periodo di 2018 te 2021.

E persona aki tabata den funcion di minister plenipotenciario di Aruba na Hulanda.

Den e mesun investigacion aki riba 17 di januari, Ministerio Publico tambe a informa cu Landsrecherche a detene un otro persona di inicialnan G.Y. L ken den e periodo di 2018 te cu 2021 tabata traha e tempo ey como director suplente di Arubahuis, sinembargo, segun vocero di Ministerio Publico a confirma ayera na Bon Dia Aruba e persona aki keda den libertad.

Investigacion Tulipan
 Prome minister Evelyn Wever-Croes a duna di conoce cu e decision pa cuminsa un investigacion a inicia cu un e-mail cu el a ricibi di forma anonimo di un grupo di personal di Arubahuis na september 2021 dirigi na henter Conseho di Minister cu copia na cierto parlamentarionan cu ta haci mencion di posibel iregularidadnan cu por a tuma luga na Arubahuis, pero e mail aki no tabatin pruebanan pa por cuminsa investiga, segun loke el a sigura.

Den mesun luna ey, a bin un otro e-mail cu contenido y prome minister a expresa cu mesora a tuma contacto cu CAD, cu DRH y Conseho di Minister pa trata e tema aki y a cuminsa un investigacion inmediatamente na Arubahuis.

Prome minister tambe a indica cu e conclusionnan preliminar cu a sali eynan despues cu CAD tabata basta leu caba cu e investigacion, ta cu gobierno mester haci cierto cambionan na Arubahuis den e tempo ey. Gobierno a cambia e top di Arubahuis y e investigacion a sigui cana na unda gobierno a trece cambionan na Arubahuis cu tabata tin mester pa evita cu e cosnan aki por sigui pasa.

E conclusionnan preliminar e tempo ey a conclui cu tabata tin 3 persona envolvi cu tabata haci cosnan cu antes tabata normal pasobra esey ta loke nan ta bisa cada biaha den nan defensa. Prome Minister a sigui bisa cu gobierno a rond af e investigacion, tanto e aspecto administrativo y disciplinario y pa e motibo ey tambe por tabata den Parlamento pa duna informacion. Tambe gobierno a pone e documentonan den man di Ministerio Publico pa determina si tabatin algo cu a bay contra ley of algo penal, pa haci investigacion e ora riba e parti ey.

Segun prome minister a informa Bon Dia Aruba na december 2022 “Centrale Accountants Dienst a splica varios suma cu B. a paga caba”.

Den investigacion aki, no ta un secreto pa ni un hende ken ta e persona cu a ser deteni e dia di ayera ya cu Bon Dia Aruba a publica varios articulo tocante e persona aki y di loke el a haci ora e tabata den su funcion como minister Plenipotenciario na Hulanda, cu den poco palabra “el a haci fiesta cu credit card” y a hasta el a huur un propiedad na Hulanda unda a drecha hardin y cura di e cas, a pone un sistema di alarma pa 10,900 euro y a haci reparacionnan den e mesun cas na un costo di 21,000 euro na aña 2020 segun rapport di Centraal Accountantsdienst di Aruba (CAD) cu a ser presenta na Parlamento di Aruba den un reunion publico dia 13 di december 2022 door di Sr. Roland Pang di CAD ken a informa e parlamentarionan y pueblo di Aruba con e investigacion a bay unda nan a investiga 18 luna so pa motibo di aplicacion di e banco ABN Ambro, algo cu a wordo cuestiona pa un parlamentario riba e hecho cu nan no tabata warda informacion di e cuenta di banco of pakico no a wordo pidi esey for di archivo.

Den esaki, tambe a bira conoci cu el a haci un biahe pa bin Aruba cu no a wordo aproba pa Conseho di Minister na december di 2020 unda el a paga na hotel Divi Village 1,300 euro, tambe su yiu cu a caba di nace a wordo beneficia cu placa di pueblo di Aruba ora el a drecha ful e camber di e integrante nobo di e famia, su casa tambe a biaha riba VIP business class na momento cu Aruba tabata pasando un mal momento debi na pandemia di Covid-19 unda mas di 4,000 hende a perde nan trabou y empleadonan publico mester a entrega 12.6% di nan salario pa yuda esunnan cu mas tabatin mester di dje, esaki ta algun ehemplo chikito di hopi gastonan cu ex-minister B a haci.

Pa dia 31 di october 2023 Ministerio Publico a confirma pa Bon Dia Aruba cu keho penal a wordo entrega contra ex-gevolmachtigde minister B. pa malversacion di placa di Pais Aruba den e caso Arubahuis.

B. su problemanan legal a bira mas grandi mirando cu aworaki su caso oficialmente ta den man di Ministerio Publico cu ta e instancia pa persigui penalmente.

Recientemente hues den su caso civil a bay di acuerdo pa retira B. for di su funcion di polis aunke e la comete abuso di su funcion den calidad di minister plenipotenciario, pero ta di opinion cu tambe por pone e straf aki den su calidad di polis. Tambe hues a bisa cu B. su accionnan cu e la haci, no ta haci’e apto pa traha como polis mas ni como un funcionario publico.

Den e sentencia ta indica cu e motibo di retiro disciplinario ta basa cu B. a comete un infraccion grave di loke tabata su deber y for di su actuacion a surgi dudanan di loke ta trata su integridad.

E ta acusa di lo siguiente:

1 – Emiti ordennan di pago cu beneficio personal.

2 – A realisa gastonan a costo di Pais Aruba.

3 – No a haci un control di facturanan.

Malversacion di placa di Pais Aruba durante biahenan priva entre 14 di december 2020 y 4 di januari 2021.

4 – Abuso di funcion ora a haya informacion pa su beneficio personal y paga na Divi Village.

5 – Den periodo entre 9 di april 2021 y 17 di mei 2021a malversa di placa di pais Aruba.

6 – A haci uso di servicionan di Elever Strategy and Solution pa su mesun interes sin un formulario di aprobacion ni un ni un evaluacion di presupuesto.

7 – A haci uso di servicionan di VIP-services Schiphol pa biahenan/vakantie priva unda e costonan tabatin como fin priva. Malversacion di placa di Pais Aruba durante biahenan di negoshi.

8 – Tabata haya dobel compensacion pa credit card cu ta pertenece na Pais Aruba y durante biahenan di negoshi y tabata usa na restaurantnan mientras cu e tabata ricibi representatiekosten.

9 – El a haci uso di servicionan VIP na aeropuerto di Schiphol pa su famia a costo di Pais Aruba. Gastonan excesivo di e minister Plenipotenciario.

10 – Gastonan excesivo y ineficiente di fondonan di Estado for di 2018 te cu 2021 reemplasando telefonnan cada dos aña, e gastonan aki sin autorisacion tabatin un fin priva como por ehemplo, cumpra di mueblenan y facturanan di comprasnan di mueblenan pa baby.

11 – El a reembolsa e prima di seguro medico di su casa directamente di caha di gobierno desde may 2019.

12 – A desvia di e procedura habitual pa haya un contract di huur.

13 – No a cumpli cu procedura di aanbesteding pa cumpra un sistema di alarma pa e cas cu el a huur.

14 – A haci gastonan innecesario y excesivo pa renoba e cas cu el a huur. B. no tabata di acuerdo cu e medida disciplinario y adopta e posicion cu e no a comete un delito grave of por lo menos algo cu ta hustifica su retiro como polis.