Awe den oranan di atardi, a keda conoci e sentencia di seis sospechoso den e caso IBIS na Corte di Apelacion, na unda cu Ministerio Publico ainda no a tuma e decision si nan lo apela e sentencia di e sospechoso principal, cu ta di tres aña di prison.

Fiscal di Ministerio Publico, Patrick van der Biezen den declaracionnan pa medionan di comunicacion presente a informa cu e sospechoso principal di e caso aki, ex-minister Paul Croes, a wordo haya culpabel den seis delito castigabel.

Den Corte di Prome Instancia, Croes a haya parcialmente un vrijspraak pa un acusacion, pero Corte di Apelacion a dicidi cu ta sentencia pa tur delito, cu ta: a comete den conhunto (delito di) pidi y acepta soborno; abuso di su funcion; comete den conhunto sustraccion (verduistering); comete den conhunto labamento di placa regularmente; comete den conhunto duna empleo ilegal; y participacion na un organisacion criminal eherciendo como minister den Gabinete Mike Eman 2, cu un castigo di cuatro aña di prison y e no mag di eherce ningun funcion publico pa un periodo di nuebe aña.

Aworaki Corte di Apelacion a dicidi di baha e sentencia un aña menos, esey ta nifica cu Croes lo haya tres aña di prison. Y loke Ministerio Publico a pidi, pa e no por eherce un funcion como funcionario publico ni tampoco por postula su mes como candidato politico durante un periodo di ocho aña.

Corte di Apelacion tambe a sentencia esposa di Croes, Melony Croes-Paesch, ken a wordo acusa na Prome Instancia pa dos hecho, esta labamento di placa y duna empleo ilegal. Di e prome acusacion, el a wordo declara inocente; pero den e di dos el a haya e sentencia di 120 ora di trabao comunitario of sesenta dia di prison si e no cumpli cu esey.

Otro cuatro persona involucra den e caso aki tambe a haya un decision di Corte di Apelacion, na unda cu Rudmila Martinus y Jairo Wever a wordo declara liber di tur acusacion; Robio di Veccia a wordo sentencia cu dos siman di prison condicional, cu un tempo di prueba di tres aña; y Ninosca Nuñez a haya un castigo condicional di 150 ora di trabao comunitario.

Sospechosonan y Ministerio Publico tin derecho pa bay na Corte di Casacion di Hulanda, pero nan tin cu studia e sentencia ainda segun loke Van der Biezen a sigura, pa wak si nan ta keda den e parti aki of nan ta bay Corte di Casacion.

Van der Biezen a sigura cu Ministerio Publico a pidi pa Croes keda deteni y bay KIA despues di wordo sentencia. Esey a wordo nenga pa Corte di Apelacion, na unda cu nan a menciona e motibo cu ta rasonabel pa Ministerio Publico, y unda cu Corte a bisa cu e circunstancianan personal di Croes no a cambia desde e momento cu e la wordo laga den libertad 2 aña door di hues comisario. Y Corte di Apelacion no a wak motibo pa detene Croes inmediatamente na momento cu e caso bira onherroepelijk e castigo di 3 aña cu Croes a ricibi tin cu wordo ehecuta.

Di su parti, Paul Croes a declara cu e ta sinti desapunta cu e sentencia di tres aña: “Mi mester bisa cu tabatin e peticion di cinco [aña] na prome instancia, y aworaki nos a haya tres y sigur ta un adelanto. Pero esey no ta loke a mi a verwacht, mi ta sinti cu basta cos di loke nos a trece dilanti na e tres huesnan no a wordo teni na consideracion”, Croes a sigura.

Na e momentonan aki Croes lo haci un evaluacion hunto cu su abogado Demis Illes y su famia, pa asina wak kico ta e miho decision cu lo sigui aworaki. “Nos ta personanan luchado cu ta keda lucha cu e sentencia aki cu nos no ta contento, sigur cu no. Pero si nos ta contento cu el a haya vrijspraak pa lo cual nan a acus’e di dje” Croes a expresa.

Tambe el a bisa cu nan no sa pa ki motibo e huesnan no a tuma den consideracion e 90 dia cu el a keda cera den isolacion na KIA, erornan haci door di Ministerio Publico y envergadura di e caso mes aki. Y nan kier discuti tur esey cu su ekipo di abogado pa mira si tin espacio pa un siguiente paso. “Mi no kier divulga nada na e momentonan aki, manera boso ta compronde, ta un rato pasa e sentencia aki a wordo lesa door di presidente di HOF. Pero mi mester bisa cu mi a keda straña cu e haltura di e vonnis; pero nos ta keda positivo”, el a afirma.

Melony Croes-Paesh a menciona cu Ministerio Publico no a apela contra su persona. “Mi no ta dispuesto di paga niun ora pa algo cu mi no a haci, y awe esaki a wordo confirma dilanti tres hues”, Croes-Paesh a señala den un declaracion hopi cortico pa prensa presente.

Abogado Demis Illes a trece dilanti cu nan ta bay lesa e sentencia manera, Croes a menciona caba, pa asina analisa pakico a tuma e decision ey. “Como defensa bo ta contento cu tur decision cu a bin acerca. Pero di otro banda, un tiki menos contento cu e hecho cu cierto ponencianan cu a wordo treci dilanti a wordo bari for di mesa”, Illes a expresa.

Casacion ta algo hopi formal y huridico. El a indica cu tin cu wak hopi procedura y cu na e momentonan aki ta mucho prematuro pa nan duna un conclusion riba esey, y nan tin cu mira puntonan valido. Segun el a anuncia e sentencia a wordo presenta den un manera hopi lihe, y el a bisa cu esaki ta cambia e perspectiva di e caso di ontneming cu tambe lo tuma luga den e luna aki “e tin su influencia”, el a finalisa.

Despues di Corte di Apelacion e acusadonan por dicidi si nan ta bay na Corte di Casacion na Hulanda na unda nan no ta wak e contenido di e caso, e recurso aki ta e parti den cual nan ta evalua si investigacion y detencion di Croes a bay bon a base di e proceduranan di e caso.