Paul Croes condena pa husticia di Aruba, ken a haya un castigo trintiseis luna di prison ta purbando tur manera pa recobra su libertad, na e momentonan aki Croes tin solamente shete luna den e instituto coreccional unda e ta pagando su condena pa varios delito como labamento di placa, draai un organisacion criminal den Cocolishi, entre otro.

“Boso a bolbe nenga mi libertad awe, pero bo no por wanta mi cera pa semper” Esey ta Paul su mensahe pa nan. Awe diahuebs ora ami cu nos 2 yiunan a bishit’e e la pidi mi post esaki! Paul Croes.” Esey tabata e palabranan cu su casa, Melonie Croes-Paesch a publica diahuebs ultimo, na unda cu e ex-mandatario a pidi e pa haci esey, manera el a sigura riba su rednan social.

Paul Croes y su Organisacion Criminal den Cocolishi

Structura: Croes a cuminsa su funcion como minister di Asuntonan Social, Hubentud y Labor den gabinete Mike Eman II na october 30 di 2013 tempo cu el a huramenta. Bao su mando e tabatin tres persona crucial cu a yud’e pa crea un structura criminal, unda cu Giovanni Capriles tabata coordinador y presidente di su fundacion, Leadership & Excellence; Selma Arends cu tabata su secretaria y tambe su prima; ademas di Roque Aparicio, cu ta su amigo personal cu a fungi como coordinador y chauffeur di ex-minister Croes.

For di eynan e organisacion criminal a cuminsa haya forma (structura), unda cu e ‘ontheffingenfabriek’ – manera Ministerio Publico a yam’e – a inicia, cu e colaboracion di otro 3 persona. Esakinan ta Juancho Filiciana, kende tabata e tramitador di permiso principal y un persona crucial den e organisacion; bao di Juancho cu ta Aleida Vasquez, propietario di Bashaka Services & Enterprises NV y su ex-pareha Felipe Schwengle, cu tabata falsifica documento y haci estafa.

Cooperacion: Pa un organisacion asina por funciona mester tin cooperacion entre e sospechosonan. Den e caso specifico aki di Paul Croes, e structura tabata asina bon hinca den otro cu via su fundacion Leadership & Excellence, na unda cu Capriles tabata su persona di confiansa, tabata ricibi un cantidad di soborno via e cuenta bancario di e fundacion. No solamente Croes tabata ricibi soborno, sino cu personalmente e hunto cu su chauffeur tabata haya diferente productonan comestibel, alcohol y placa efectivo a cambio di un firma di un ontheffing.

Di otro banda, tambe Selma Arends, kende tabata fungi como secretaria, tabata yama na diferente compania for di Cocolishi pa pidi soborno, na unda cu e tabata forsa e hendenan cu a cumpra ontheffing for di Paul Croes pa cumpra carchi di concierto di Pasco y pa deposita e placa riba cuenta di e fundacion.

Entre Croes cu Juancho Filiciana tambe tabatin bon cooperacion, na unda cu ora Filiciana tabata tramita un permiso e tabata duna Croes un cierto cantidad di placa pa e ontheffing. Dia 28 di maart di 2017 a haci un entrada hudicial na Filiciana su cas, na unda Landsrecherche a haya cinco envelop cu e nomber di Paul Croes, cada un cu 1.000, 2.000, 2.500, 3.000, 3.500 skirbi riba nan.

Continuacion: E hechonan castigabel aki a wordo haci den periodo di aproximadamente cuater aña, for di 30 di october di 2013 te cu 28 di maart di 2017, den colaboracion cu e sospechosonan Aparicio, Capriles, Filiciana y Arends, na unda cu nan a comete den conhunto e delitonan di pidi y acepta soborno y sustraccion (verduistering) intencionalmente.

Despues di 2 aña y 6 luna cu Ministerio Publico a inicia un investigacion contra ex-minister Paul Croes, tabata dia 15 di januari 2019 ora e caso IBIS a cuminsa haya forma na Corte di Prome Instancia na unda cu e tabata insisti cu e tabata inocente di tur acusacion den e caso penal aki, el a señala cu Ministerio Publico a interpreta e informacion acumula robes y tabata usa esey na nan fabor.

Croes su declaracion tabata con el a experencia e situacion cu el a haya su mes aden. Loke a resalta e biaha aki, ta cu tanto Croes como su casa, tabata bou tratamento psicologico, y cu e biaha aki nan tur dos a papia abiertamente riba nan caso compara cu anteriormente unda nan no tabatin confiansa den M inisterio Publico loke a pone e fiscal encarga cu e caso cuestiona esaki.

Nan responde Fiscal “Nos no ta confia boso, p’esey”. “Nos no tabatin confiansa den e proceso. Nos tin confiansa den bo persona”, Croes a bisa e hues dado momento. Durante e curso di e caso, tabata notabel e cambio di tono y apariencia di Croes, cu tabata teriblemente indigna cu e forma di procede di Ministerio Publico.

Na e tempo ey, Ministerio Publico a investiga 400 compania pa e caso aki y tabatin un total di 23 sospechoso.

Corte Superior

Dia 12 di october 2021 Corte Superior a condena Croes na 3 aña di prison, 8 aña cu no mag di ocupa un funcion publico y no mag di participa den politica. E caso IBIS tabata trata di organisacion criminal manera hues a denomin’e el cual a draai specificamente den e periodo di 30 di october 2013 pa 28 di maart 2017.

Corte Supremo di Hulanda

Dia 7 di februari 2023 corte di casacion ta ratifica e sentencia di Corte Superior di 3 aña di prizon, 8 aña cu no mag di ocupa un funcion publico y no mag di participa den politica ta bira definitivo y di inmediato.

Caso IBIS oficialmente a cera e dia ey cu e ultimo sospechoso unda e ex-mandatario ta na KIA pa asina paga su condena di 3 aña sin ningun herment legal cu e por usa mas.

Pa Croes por haya su libertad condicional ainda ta falta 15 luna pa por completa dos tercera parti di su castigo na unda cu ley ta dun’e e espacio pa sali den libertad condicional of den otro caso, minister di Husticia mirando e situacion cu KIA ta surpasa e cantidad di detenidonan, por firma un voorwaardelijke invrijheidstelling (v.i.) pa laga Croes den libertad.

.