Ex-minister Otmar Oduber a referi brevemente y sin menciona nomber, tocante e acusacion cu un miembro di Tweede Kamer a haci riba rednan social y cu no solamente di tacha su persona, sino di pais Aruba tambe.
E miembro di Tweede Kamer na Hulanda a referi cu na cierto momento cu tin informacion riba cosnan cu no ta bayendo bon na Aruba relaciona entre otro na corupcion. El ex mandatario a bisa cu den su carera politico di 22 aña, nunca el a conoce e persona aki. P’esey e ta abstene di bisa algo directamente relaciona cu e persona aki.
E ta lamenta cu e persona aki, como politico den un institucion considera como respetabel na Hulanda, ta uza expresionnan cu e mesun persona aki, no ta sigur di e mesun informacion cu e ta referi na dje. Pues e mesun politico Hulandes no ta sigur di su fuente. Te hasta e ta kere cu loke e politico Hulandes a pone, e mes no a skirbi’e. E ta convenci cu mas bien e persona aki a pone algo cu un hende a manda p’e.
Sinembargo –segun Oduber – e miembro di Tweede Kamer a bin cu un cantidad di documento poni riba social media, como si el a haci un gran investigacion. Pero Oduber ta kere cu e fuente tabata su mes, pasobra tempo cu e tabata minister, el a pone tur e documentacion aki disponibel riba incinerator chikito di DOW. E documentonan aki tabata accesibel pa tur hende a base di transparencia, el a bisa.
Na final e ta lamenta cu tin politico na Hulanda cu ta expresa di e forma aki riba Arubianonan y riba nos pais, ora cu e ta vocifera su opinion riba reino. El a referi na e situacion cu ta tumando luga actualmente na Merca pa causa di discriminacion.
“Pakico antagonismo. Pa kico discriminacion ta purba di tuma luga di parti di Tweede Kamer aki pa cu Aruba.” Ex-minister Oduber a bisa cu e kier haci un yamado, no como politico mas, sino den nomber di Aruba y Rubianonan pa ‘respeta nos’.
