Ni Evelyn Wever Croes, ni Andin Bikker, ni Dellanire Maduro a para pa integridad ora cu el a señala un cantidad di iregularidad na Serlimar y buro di Minister. P’esey ex Minister Marisol Lopez Tromp no ta kere cu compromiso cu integridad ta motibo cu a disolve Parlamento.

Integridad ta, si ora cu un ex colega di Conseho di Minister y consehero di Prome Minister Evelyn Wever Croes ta bira sospechoso di investigacion penal grandi y ta actua mesora y exigi claridad. Al contrario, a keda brasa ex lider di POR Otmar Oduber y e persona cu a asumi e responsabilidad di Minister y a expone yen di mal maneho ta haya un cor’i di Gobierno.

Asina ta e reaccion di Marisol Lopez Tromp riba e decision di Prome Minister Evelyn Wever Croes pa disolve Parlamento di Aruba, basa riba desconfianza den partido POR. Prome Minister a bisa cu e decision cu el a tuma ta basa riba integridad.

Pero pa Marisol Lopez Tromp, e palabra ta bashi y Evelyn Wever Croes no por hunga santo awor. Pasobra, simplemente, ora cu Lopez Tromp a asumi e cartera di Ordenanza Teritorial,Infrastructura y Medio Ambiente y a topa cu un cantidad di iregularidad, Evelyn Wever Croes no a sosten’e. Al contrario. A haci tur lo posibel pa core cu Marisol Lopez Tromp. Mescos ta conta pa Minister di Husticia Andin Bikker, cu en bes di a sostene e trabao di su colega di partido y colega Minister, ta pasa pa cataloga Lopez Tromp como dificil. Tur pasobra Marisol Lopez Tromp a expone casonan cu den su concepto, no ta cuadra cu un maneho di integridad.

“Ami no ta sigur kico por a pasa cu e fraccion mes. Realidad ta Ministerio Publico a laga sa cu ta investigando e fraccion di POR den Parlamento, riba sospecho di e malversa placa. Pero mas cu esey, mi no sa kico por a pasa.”

Fundacion di fraccion

Marisol Lopez Tromp tabata dirigi e fraccion di POR prome cu el a bira Minister. El a splica cada fraccion den Parlamento mester lanta un fundacion, cu na su turno ta ricibi placa pa cubri gasto di e fraccion. Pues cada fraccion ta haya placa cu ta presupuesta pa sostene e trabao. Mirando cu fraccion di POR tabata hopi chikito, no tabatin suficiente placa pa paga pa un asina yama ‘fraktie-medewerker’ pa tempo completo. Mas bien, tabata traha cu un part-timer. “Tur fraccion den Parlamento ta traha cu e sistema di un fundacion cu ta haci e pagonan. E tempo cu ma drenta Parlamento pa POR, lider di e partido Otmar Oduber y Andin Bikker a puntra mi pa bira Presidente di e fundacion. Pero ma bisa cu no, pasobra ya mi tabatin hopi cos pa haci.”

Asina Alan Howell a bira Presidente di e fundacion y miembro di POR Jacqueline van Putten a bira tesorero. “Ami a traha hopi cerca cu Sra. van Putten. Tempo cu mi tabata den fraccion, e tabata haci e pagonan cabalmente y tabata percura cu tur e pagonan tabata cubri cu e documentonan corespondiente,” Lopez Tromp a sigui bisa. “Kico por a pasa despues, mi no sa. Ministerio Publico no a menciona un nomber. E por nifica cu un hende a haci un denuncia, pero no a bisa mas cu esey.”

Baha Gobierno

Locual Marisol Lopez Tromp ta haya straño ta cu diripiente e caso aki, cu ta trata di sumanan relativamente chikito y unda Ministerio Publico no a menciona nomber mes di ken ta sospecha di lo a haci e malversacion, ta suficiente pa Evelyn Wever Croes entrega retiro di Gobierno pa motibo di integridad.

Segun Lopez Tromp, e ta mustra mas bien cu a gara cualkier oportunidad pa baha Gobierno, kizas prome cu vota pa e rijkswet COHO. “E tabata obvio cu tabata busca un forma pa Sr. Ricardo Croes di RED rabia y kita sosten di Gobierno. Ora cu esey no a sosode, ta usa e argumento aki.”

E ex Minister ta bisa cu e ta kere cu tin mas cos ta sosodiendo cu locual kier aparenta. “Aunke un malversacion ta malo, tin mas cos cu a pasa y cu no por a haya aprobacion y tanto Andin Bikker y Evelyn Wever Croes a keda sin bisa algo. Lo a pensa cu Gobierno lo mester a cay pa motibo di ‘integridad’ ora cu Ministerio Publico a acusa Otmar Oduber di un cantidad di cargo hopi pisa. Si tabata desconfia di e partner di POR, ta e tempo ey mester a pidi pa disolve e partido.” Pero e contrario a sosode. Ta net e como Minister cu a señala casonan iregular a haya problema cu Andin Bikker y despues cu Evelyn Wever Croes y partido MEP. “Esaki ta djis un momentum pa benta e retiro di Gobierno riba POR. No a logra cu Ricardo Croes durante e reunion riba COVID-19, dialuna ultimo.”

Integridad ta zona ironico

Marisol Lopez Tromp a bisa cu dia cu el a uni na POR, e no por a premira tur e drama aki. “Ta ora bo ta den dje, particularmente como Minister bo ta wak kico tur tabata sosode. Ami a duna di conoce kico mi a topa cune y nan no spera cu ami lo a haci esey.” Den concepto di Lopez Tromp, diripiente Andin Bikker kier laba man di POR, pero te cu algun siman tras di lomba, hasta ora un persona yega na su bufete a keda deteni, asina mes e no a tuma distancia di POR. “For di momento cu mi a bira Minister, e tabata obvio cu Andin Bikker tabata mas leal na Prome Minister y MEP cu na su colega Minister di POR, esta mi persona. Semper el a sostene Prome Minister. En bes di el a bringa hunto cu mi e aspectonan di integridad, el a scoge pa ex lider di POR, Otmar Oduber. E ta asina ironico cu awor tur dos ta bisa cu e problema ta integridad, pero ora cu mester a realmente para pa esey, ningun a haci’e,” ta e conclusion di Marisol Lopez Tromp, kende ademas ta bisa cu Dellanire Maduro, lider di fraccion di POR, tampoco por distancia di e problema. “Ningun tabata kier a tende di iregularidad cu ex lider di POR a haci y a core cu mi cu a expone esakinan.”