ORANJESTAD – E asunto di traficacion di oro for di Venezuela via Aruba pa bay Europa, a cuminsa lanta cabes bek. Esaki despues cu mas cu un aña pasa a wordo crea un crisis diplomatico cu Venezuela, ora cu e regimen di Nicolas Maduro a dicidi di cera e frontera cu nos pais pa motibo di e trafico di mineral precioso aki.

Ayera un biaha mas a wordo divulga informacion cu mas tanto e frontera maritimo y no aereo a keda cera, pero gobierno di Aruba a laga sa cu e informacion aki no a wordo confirma oficialmente via canalnan diplomatico.

E crisis aki na januari 2018 a ocasiona cu nos comunidad no por abastece cu productonan mas barata, entre nan fruta y berdura, cu ta bin for di Venezuela pa nos consumo local. A pesar di tur esfuerso cu gobierno di Aruba a haci cu su partnernan di Reino, e crisis aki a wordo prolonga un par di luna.

“Donde esta el oro?”
Ex minister di husticia y parlamentario di oposicion, Arthur Dowers, a referi un biaha mas riba asunto di oro. El a indica cu e prome mandatario tabata consciente ‘donde esta el oro’ ora cu e crisis di Venezuela a cuminsa, ya cu su buffet di abogado estableci na Arulex Center tabatin como cliente un di e personanan relaciona cu e transporte di oro na Aruba.

E ta aclaria cu tur cos tabata legal, y cu e actividad aki a cumpli legalmente cu tur loke ta wordo exigi. Segun ex minister di husticia, e negoshi aki a cumpli como cualkier negoshi cu ta importa cualkier producto di afo. Contestando pregunta di Bon Dia Aruba, Dowers a bisa cu e cargamento di oro a drenta legalmente na Aruba. Pero locual e ta haya incorecto ta cu minister presidente di nos pais a bay ‘tene man cu Venezuela’ bisando cu si ta berdad cu gobierno anterior di Aruba a permiti pa algo ilegal pasa na Aruba. Mientras cu nada ilegal relaciona cu e oro a pasa na Aruba.

Pero e punto aki pa parlamentario Dowers ta mas di principio patriotico cu di negoshi. Ya cu ora e crisis aki a inicia na principio di januari aña pasa, masha poco hende tabatin conocemento cu Aruba tabata un trampolin pa manda oro Venezolano pa Europa. Pero e ta haya cu e prome mandatario a bay contra di pais Aruba, como ‘si fuera cu nos tabata haciendo algo ilegal.’

Te hasta e pregunta cu tabata den laira e tempo aya tabata: ‘donde esta el oro?’ Mientras cu nos prome mandatario tabata consciente y tabata sa di e transporte di oro aki. Ya cu e meneer envolvi den e negoshi aki tabata un cliente di dje.

“E persona aki tabata bon amigo di bosonan,” el a bisa. Dowers no ta culpa e persona, pero si e minister presidente, ‘cu ta haci como si fuera cu no sa di e negoshi, siendo cu akinan ta mustra cu e mes tabata ricibi placa di e negoshi’.

Dowers a expone algun documento cu ta mustra cu e mandatario mester tabata sa di e negoshi aki pa medio di su buffet. E ta deduci cu e persona cu ta transporta oro logicamente ta paga pa nan servicio di abogado y/of advisor, pues e mandatario a wordo beneficia tambe.

Dowers a reacciona riba e acusacion formula pa e parlamentario Endy Croes (MEP), kende a laga sa cu ta Dowers mes ta esun cu a permiti cu durante gobierno anterior 27 ton di oro a pasa via Aruba y sigui pa Europa. Dowers a declara cu Croes no sa cu tin un ley special cu ta regarda trecemento y exportacion di productonan na Aruba. E ta lamenta cu e parlamentario aki di e coalicion di gobierno a publica un ‘barbaridad’, sin sa cu tin un diferencia entre minister di husticia cu minister di finansa.