E ex minister di Husticia y actual parlamentario, Arthur Dowers (AVP) ta considera como inhusto e detencion di e hoben Marko Espinoza relaciona cu e denuncia of keho hudicial cu gobierno actual a haci riba aparatonan cu a disparce for di Bestuurskantoor. E ta spera cu e caso aki no ta uno cu hendenan ta keda cera tempo largo, sin cu nan a haci nada. “Nos no ta liber di esey”, segun e ex mandatario.

E ta haya cu e detencion di un hende ta un sorto di remedi uza na momento cu un hende ta forma un peliger pa un comunidad y cu por causa un impacto pa sociedad, segun ley ta prescribi. Of tambe pa evita cu e por huy of stroba e informacion. Pero basa riba e proces-verbaal cu tin e no ta mira con nos autoridad por yega riba Espinoza, bisando cu e ta e persona cu a bay cu un aparato.

E ta haya mas cu hustifica si pa ehempel polis ta topa bo cu un computer of otro artefacto horta. Eynan nan por detene bo y cera bo tambe. Pero esaki no ta e caso cu e scandal rond di ekipo somenta na Bestuurskantoor, segun parlamentario Dowers. E denuncia haci ta papia di un cantidad di cos cu a disparce, y nan a bay cu un persona cu a traha den e departamento di prensa di e gabinete anterior.

“Mi no ta compronde dicon bo ta coy e meneer aki cera. Si e no ta necesariamente responsabel pa e material aki”, el a bisa.

El a haci referencia riba un computer cu ta wordo papia di dje di 16 mil dollar, casi 40 mil florin. Pero e mes ta bisa cu unda a wak den Bestuurskantoor un computer pa e balor aki. “Si e tabata den Bestuurskantoor mi no sa, mi no a wak’e nunca.”

Sr. Dowers a indica cu e denuncia ta bisa cu un lista di cos a disparce. Pero ora cu bo mester haci un denuncia asina, bo mester tin prueba cu e cosnan aki a wordo horta. E ta kere cu por ta e cosnan aki, eventualmente por ta den otro departamentonan. Of cu un minister a autorisa un hende pa bay cu ne pa otro oficina di gobierno. E no ta castigabel, ya cu minister tin autoridad pa e persona por bay cu ne.

Pero te dia di awe –segun parlamentario Dowers- gobierno no a acerca debidamente pa puntra na nan departamentonan, si nan a bay cu algun di e cosnan cu tabatin den Bestuurskantoor, durante e ultimo gobernacion. “Pero mesun cos bo ta puntra tur hende con pa goberna, bo por puntra si tin un computer cu a bay tal caminda y bo ta haye? Si acaso cu e computer por a bay!,” el a bisa.

Igualmente el a laga sa cu papiando di su ministerio, tabatin algun cos cu a bay pa departamentonan ya cu como mandatario e tabata haya cu tabata hustifica pa nan bay ayanan. El a recorda cu na 2009 ora cu nan a yega na bestuurskantoor nan ‘no a haya net nada’.

Parlamentario Dowers a desmenti cu tabatin un inventario riba tur cos of buki ningun caminda.