Ex minister di finanzas y parlamentario actual di oposicion, Richard Arends a referi na e proyectonan di infrastructura PPP (Private Public Partnership), cu a realisa durante gobernacion anterior y e peso cu esaki ta nifica pa finanzas di pais Aruba.

Una vez cu un di e tres rapport di Contraloria General di Aruba (ARA) tocante e proyectonan Bo Aruba a wordo trata den prome buelta den parlamento siman pasa, e sensacion cu a laga atras tabata nada positivo.

Aunke nan tabata proyecto infrastructural valioso y cu a wordo realisa, nan tabata proyecto cu un costo demasiado halto, y sin control debido riba gastonan di inversion. Pero tambe un falta di responsabilidad di e gobierno anterior pa bin cu proyectonan miyonario, sin tene cuenta cu e sostenibilidad financiero di un pais chikito, manera Aruba, pa paga e debe grandi cu e proyectonan aki a hinca nos pueblo aden.

Arends ta considera e preocupacion aki expresa pa Bon Dia Aruba den forma di pregunta como uno valido. Pero igualmente el a bin cu e cuestionamento riba kico lo tabata e prijs den perdida di crecemento economico cu nos mester confronta, si e proyectonan aki no a bini. Nan ta proyectonan cu tin di haci entre otro cu embeyecemento di centro di ciudad, pero tambe cu renobacion y expansion di hospital, Green Corridor y Watty Vos Boulevard.

Sinembargo e ta haya cu e reunion publico cu a tuma luga den parlamento tabatin ‘un tinte totalmente politico pa tira tur lodo riba partido AVP’. E dia cu e reunion publico aki – pidi pa e fraccion di MEP – a tuma luga, Arends a bisa cu e tabata den parlamento, pero nan no ta participa di un tipo di reunion asina.

Sinembargo el a haya cu den e reunion aki tabatin tres minister cu absolutamente no tabata involucra den e proyectonan aki, ni tampoco ta e autor di e rapportnan aki. “Na su luga lo tabata cu Contraloria General lo a bin duna un splicacion di e cuater rapportnan aki,” segun Arends. Despues di un splicacion di parti di ARA, e parlamentario en cuestion tabata haya prudente si pa invita gobierno pa bin duna un splicacion kico nan ta bay haci y kico nan ta bay mehora.

Rapport ARA y proyectonan PPP

Encuanto si e rapport di ARA ta gosa di nan credibilidad, Arends a bisa cu si. ARA a traha e rapport aki y nan no ta bay duda den integridad y independencia di estudionan cu Contraloria General a haci. “Na momento cu parlamento cuminsa duda den independencia y tambe e integridad di rekenkamer nos tin un problema hopi serio den e pais aki,” el a bisa. El a agrega cu esey a sosode cu e cuenta anual di 2016 cu parlamento kier manda bek pa ARA. E ta haya cu un acto asina ta mina e autonomia y integridad di e instituto aki.

El a referi cu for di prome cu aña 2011 caba, Aruba no a conoce proyecto infrastructural grandi. Nan tabata forma parti di un plan di inversion extenso ariba tereno di infrastructura, desaroyo urbano y energia. “E pais bo ta midie na e calidad di su infrastructura y calidad di su desaroyo urbano, y esaki a keda stagna for di aña 2001,” el a bisa.

Pues e opcion riba mesa tabata lag’e asina y laga cu nos pais ta bay atras su mes den forma economico. Of e otro opcion tabata di bin cu e tipo di inversion infrastructural aki. Nan ta proyecto cu ta wordo paga den un periodo largo di mas cu dos decada. E ta compara esaki manera ora bo ta cera un hipoteca pa bo cas, caminda banco ta conta cu bo entradanan pa e resto di e añanan venidero di bo bida laboral.

Ademas el a bisa cu e debenan aki cu ta parti den 30 aña, y algun di e proyectonan PPP ta menos aña, ta sumanan cu pais Aruba por carga. Arends a bisa cu e total di e suma di primanan cu nos ta paga pa proyectonan PPP (Private Public Partnership), e ta rond di 1.5% di bo GDP. Na aña 2016 e ta corda cu e colegio di supervision financiero CAft a duna un conseho cu e maximo mester ta 2%. El a yaga casi na e maximo, pero parlamentario Arends no ta kere cu e ta algo cu economia di Aruba no por carga.