Ex-Minister di Enseñansa: “Tin mas pobresa, y na dado momento esey ta bay aumenta e conflicto social”

Recientemente Educacion Profesional Basico (EPB) a tene un conferencia di prensa na unda a adresa e diferente incidentenan cu ta tumando luga den e institucion relacion cu seguridad di studiante- y maestronan. Un situacion cu cada aña ta empeora. Durante entrevista cu Partido Red Democratico a puntra ex-Minister di Enseñansa, Rudy Lampe, su punto di bista ariba e situacion aki y kico lo por haci pa yuda mehora e situacion alarmante aki.

Lampe a expresa cu educacion ta refleho di e problematica social, un problema cu mester di atencion urgente. El a indica cu mester analisa e problema mas profundo, kico ta e raiz, dicon ta yega na situacionnan asina di violencia pa asina atende cu e problematica social.

“Nos famianan, den nos casnan, den nos hogarnan,. Y bo ta ripara cu tin mas pobresa unda cu na dado momento esey ta bay aumenta e conflicto social y esey ta bay aumenta e ora e violencia na scolnan. Kiermen mester atende cu esey na prome luga,” el a remarca.

Di dos punto cu el a trece pa dilanti ta cu, el a señala, tin un sistema di educacion cu ta kibra e autoestima di e mucha y cu esey ta traumatisa y genera diferente problema.

El a splica cu ora e tabata minister un di e cosnan cu e tabata contra di dje tabata pa stigmatisa e muchanan door di laga nan haci un IQ test. “Eynan ya caba ta dicidi bo ta bay supuestamente un ‘domme’ school. Ya bo a caba cu e autoestima di e mucha,” el a indica.

E ex-minister a señala cu Finlandia, e pais mas exitoso na mundo den e sector di educacion, su sistema di enseñansa ta basa riba aumenta e autoestima di e mucha y e sistema di educacion di Aruba ta basa ariba kibra e autoestima di e mucha.

El a agrega cu na Finlandia no ta existi scol special, pero na Aruba ora un mucha bay EPB tin biaha tin mucha ta bisa cu esey ta Enseñansa Pa Burico.

“Tristo cu un mucha ta bisa esey di su mes y di su scol. Kiermen ora bo kibra e autoestima di un mucha e trauma ey por wordo refleha den expresionnan di agresion, di violencia,” el a subraya.

Lampe a splica cu el a presenta diferente reforma cu a ricibi hopi protesta pasobra entre otro e tabata kier pa no tin scol special mas, cu excepcion di scol Dorna Sol cual pa motibonan medico e muchanan ta atende e scol ey, pa asina yuda atende cu e problematica social y yuda cu mehora cu e sistema di enseñansa cu ta kibra e autoestima di e muchanan.

El a sigui splica cu den e reformanan cu el a presenta scol Dorna Sol lo tabata e unico scol special y e resto di scolnan mester ta integra caminda un mucha no ta haya stempel cu e ta menos cu e otronan.

El a menciona e reforma pa scol EPB tambe, un reforma di EPB cu mester a bin na unda e kier a bin cu e sistema di MAVO, HAVO y VWO, y VMBO unda ta integra EPB den e sistema di beroepsonderwijs unda cu u practicamente un studiante no ta drenta e trayecto di MAVO, HAVO of VWO, si e ta scoge pa trayecto ey of e studiante ta scoge pa yega e trayecto di EPI, MBO, HBO via beroepsopleiding y tur dos ta mesun respeta y tur dos ta wordo reconoci cu prestigio.

“P’esey nos a cuminsa crea MAVO, HAVO na Mon Plaisir, cu ta bayendo bon, nos ta creando MAVO HAVO y VWO y haci’e un scol publico na De Schakel. Mi a bin cu e proposicion pa haci Colegio Nigel Mathhew MAVO, HAVO y VWO, pero tabatin protesta,” el a bisa.

El a agrega cu el a propone pa haci Colegio Arubano MAVO, HAVO y VWO tambe y el a propone pa parti di Juliana School tambe bira MAVO, HAVO y VWO y e otro parti lo a bay na edificio di EPI na unda un parti studiante ta scoge pa e beroepsopleiding y e otro mavonan ta wordo integra hunto cu EPB cu ta bira VMBO cu ta prepara e studiante pa bay EPI.

“No tabatin mester di traha un edificio nobo pa Juliana School manera nan a anuncia, esey ta gastamento di placa por nada, si nos a haci e sistema aki, y e ora bo ta traha riba autoestima y e muchanan ta sinti cu nan ta den un trayecto cu ta wordo respeta. Aworaki no ta asina y p’esey e problema di EPB bo ta wak cada bes e ta keda surgi tanten cu bo no ataca e raiz di e problema,” Lampe a remarca.

Por ultimo el a menciona cu el presenta un plan pa un scol sigur (veilige school). E plan ey, el a indica, ta full cla, pero no ta wordo ehecuta.

El a recorda un situacion parecido ora cu el a introduci Papiamento y e Scol Multilengual Arubano, na 2018. El a splica cu el bin cu e maneho pa tur scol y tur material ta cla. Cu e maneho aki Papiamento ta wordo introduci den e prome añanan, e mucha ta siña lesa y skirbi den Papiamento.

El a subraya cu tur cos ta cla desde 2018, pero no a introduci’e y aworaki, seis aña despues, gobierno a anuncia cu ta bay introduci e maneho aki na 2024 pasobra Directie Onderwijs ta bisa cu tin base di apoyo bao di docentenan .

“Aworaki diripiente tin e base di apoyo y ora ami kier a introduci’e no tabatin. Kiermen e situacionnan aki ta pone cu ta perhudica e mucha pasobra un mucha cu siña skirbi den su idioma, su autoestima ta bay ta grandi. Tur esey ta cambionan cu mester a wordo introduci for di 2018 y no a haya apoyo pa haci’e,” el a enfatisa.