Ex minister di economia y parlamentario di AVP, Richard Arends: Di dos y di tres kwartaal ta determina si tin surplus

Ex minister di economia y parlamentario di oposicion, Richard Arends (AVP), a laga sa cu e surplus cu gobierno a anuncia riba e prome kwartaal di presupuesto 2019, ta un desaroyo normal y nada excepcional. Pero si e ta haya cu e di dos y di tres kwartaal si ta duna bo un bon indicacion pa determina si gobierno por a logra e surplus cu nan a anuncia.

“Tur resultado di prome kwartaal ta mustra bon,” el a contesta riba un pregunta formula pa Bon Dia Aruba. El a tuma nota di e prome kwartaal di e presupuesto 2019 cu a drenta Parlamento y basicamente –parlamentario Arends a expresa- tur prome kwartaal ‘ta mustra bon y ta duna.’

El a bisa cu den pasado esey tabata e caso, unda for di 2014 nan a yega di entrega 10 rapport di nan presupuestonan, y e patronchinan di nan a mustra cu bo crea den e prome kwartaal un bon resultado, pero e di dos y di tres kwartaal ta esun cu di berdad ta duna bo un indicacion si bo ta logra e presupuesto si of no.

Un factor tin di haber cu e dianan di fiestanan durante e periodo di e ultimo cuater luna, cu por a contribui cu e presupuesto 2019, entre su entrada y gastonan, por a genera den e prome kwartaal aki un surplus di 7 miyon florin.

Aunke e ta reconoce cu e prome kwartaal aki a mustra bon, e ta mas interesa riba e resultadonan di e di dos y di tres kwartaal. Segun e parlamentario y ex minister Arends, den e kwartaalnan aki ‘bo ta wak kico ta e realisacion di berdad.’

Den su breve analisis, Arends a trece dilanti cu cobransa riba cierto belasting ta tuma luga na mei, pero bo no ta wak nan bek den e otro lunanan. Na momento cu e cobransa ta cuminsa sali, entre nan grondbelasting, winstbelasting cu mester wordo paga den e luna aki. Despues den e di dos kwartaal nos ta bay wak di berdad si gobierno ta realisa su presupuesto si of no.

Pero di otro banda, tin gastonan cu no a wordo presupuesta, entre nan reparatie toelage pa e pensionadonan, cu ta un gasto adicional di 14 miyon di florin, y cu no ta aparece riba presupuesto 2019. Di otro banda, SIN taxes cu a wordo presupuesta no ta bay drenta na vigor, y e ta un suma calcula na 15 miyon florin cu no ta bay drenta. Solamente den e cifra aki ya nos ta papiando di 29 miyon florin.