Diabierna ultimo, ex-minister Guilfred Besaril a keda back den libertad despues di a pasa 24 dia den detencion.
Esaki a keda reporta pa noticiero online, NoticiaCla riba diabierna. Ministerio Publico (OM) no a solicita e prolongamento di e detencion di Besaril, y Hues Comisario a bay di acuerdo cu esaki, y asina e ex-minister a keda back den libertad. Sinembargo, si Besaril ta continua como sospechoso den caso Tulipan, pa cual investigacion ta continua.
Manera Bon Dia Aruba a publica, dia 13 di februari ultimo a keda deteni e ex-minister Plenipotenciario di Aruba na Hulanda en relacion cu e investigacion di caso Tulipan. OM a identifica e ex-minister cu e inicialnan G.F.B.
Investigacion Tulipan ta dirigi riba iregularidadnan na Arubahuis den e periodo di 2018 te 2021.
E persona aki tabata den funcion di minister plenipotenciario di Aruba na Hulanda.
Investigacion Tulipan
Segun loke ta conoci di e investigacion, mientras cu e sospechoso tabata den su funcion como minister Plenipotenciario na Hulanda, den poco palabra “el a haci fiesta cu credit card” y a hasta el a huur un propiedad na Hulanda unda a drecha hardin y cura di e cas, a pone un sistema di alarma pa 10.900 euro y a haci reparacionnan den e mesun cas na un costo di 21.000 euro na aña 2020. Esaki segun rapport di Centraal Accountantsdienst di Aruba (CAD) cu a presenta na Parlamento di Aruba den un reunion publico dia 13 di december 2022 door di Sr. Roland Pang di CAD, ken a informa e parlamentarionan y pueblo di Aruba con e investigacion a bay, unda nan a investiga 18 luna so pa motibo di aplicacion di e banco ABN Ambro, algo cu a wordo cuestiona pa un parlamentario riba e hecho cu nan no tabata warda informacion di e cuenta di banco of pakico no a wordo pidi esey for di archivo.
Den esaki, tambe a bira conoci cu el a haci un biahe pa bin Aruba cu no a wordo aproba pa Conseho di Minister na december di 2020, unda el a paga na hotel Divi Village 1.300 euro. Tambe su yiu cu a caba di nace a wordo beneficia cu placa di pueblo di Aruba, ora el a drecha ful e camber di e integrante nobo di e famia. Su casa tambe a biaha riba VIP business class na momento cu Aruba tabata pasando un mal momento debi na pandemia di Covid-19. Esaki ta algun ehemplo chikito di hopi gasto cu e ex-minister a haci.
Pa dia 31 di october 2023 Ministerio Publico a confirma pa Bon Dia Aruba cu keho penal a wordo entrega contrae ex-minister pa malversacion di placa di Pais Aruba den e caso Arubahuis.
B. su problemanan legal a bira mas grandi mirando cu su caso oficialmente ta den man di Ministerio Publico cu ta e instancia pa persigui penalmente.
