Segun un comunicado di Ministerio Publico di ayera diabierna, departamento di Landsrecherche a informa cu nan a scucha varios testigo e siman aki pa loke ta trata e caso den investigacion denomina ‘Caso Avestruz’.
Ministerio Publico (OM) a expresa cu hues comisario a duna orden pa detencion (bewaring) di e ex-minister y parlamentario di partido AVP Benny Sevinger riba nan peticion. Esposa di Sevinger, C.M.C.H manera a keda conoci siman pasa tambe a keda deteni, pero dos dia despues a keda liber, aunke e ta keda como sospechoso den e caso aki.
Den e proceso di Voorarrest na Aruba, ora un sospechoso ta bay bewaring pa motibo cu su detencion a wordo prolonga pa 8 dia mas. E mester bay KIA, despues e fiscal por pidi 8 dia mas pa prolonga e detencion preventivo y despues di esey e fiscal ta pidi detencion (gevangenhouding) cu ta maximo 60 dia.
Fiscal por pidi un prolongacion di gevangenhouding cu 30 dia mas y un di dos prolongacion cu ta 30 dia extra prome cu nan presenta e caso den corte.
Ademas, nan a duna di conoce cu hues-comisario a rechasa riba diaranson ultimo e peticion di suspende e detencion di e sospechoso P.Th.A.S cu segun MP a bisa e sospechoso aki a pidi anteriormente pa suspende su peticion.
