Den cuadro cu conmemoracion di victimanan di e segunda guera mundial y celebracion di e liberacion for di ocupador Aleman, Bon Dia a sinta combersa cu Ex-Militar Reinier kenda ta conta nos cu su dos officialnan cu a siñ’e tur cos a pidi pa e bay media y conta su storia pa motibo cu e ta e prome rubiano cu no solamente a bay 5 aña Mariniers na Savaneta, Hulanda, y Mariniers Mericano, pero tambe a bringa y hiba e bandera di Aruba den guera na Iraq.
Reinier Koole tabata den servicio di Mariniers na Hulanda den aña 1995 pa 1996 y despues e la drenta Mariniers Kazerne Savaneta te cu aña 2002 na unda e la continua cu mayoria di su training. Despues di esaki e la bay forma parti di e United States Marine for di 2003 te cu 2012.
”Guera semper ta keda un topico hopi sensitivo pasobra e no ta mandatorio pa tin respet pa Militar. Cada hende tin su opinion, por ehempel cierto hende den prensa a cuminsa bira politico riba mi, haciendo diferente tipo di acusacion cu nos a bay Iraq pa e petrolio cu cosnan asina. Ami a drenta militar, haya mi opdracht y haci locual mi mester a haci sin mata ningun persona inocente, aunke cu e cosnan aki ta pasa tog bo ta purba di haci bo best pa evita incidentenan innecesario.” Sr. Koole ta bisa.
No tin hopi interes pa conmemoracion di 4 di mei
E motibo pakico no por tin mesun hopi interes den e conmemoracion di 4 di Mei segun sr.Koole e ta pensa cu si e no ta un famia grandi manera un Werleman, Croes of Eman of cualkier otro cu por a muri den guera e ora ey kisas e interes lo ta un poco mas halto. ”Sinembargo, mi no ta kere e ta haci un diferencia na e famia di e victimanan .E por sinti bon pa wak hopi hende conmemora nan pero mi echt no ta pensa e ta haci un diferencia, nan no tey mas tog”, sr. Koole ta splica.
Na Hulanda, un hoben a cuminsa cu un accion caminda e kier stop e conmemoracon di 4 di Mei pa motibo cu e ta haya Hulanda no ta trata e fugitivonan bon y ta actuando den un manera hopi hipocrita.
Segun sr.Koole, e hoben aki tin su rason den cierto parti pero pa stop completamente cu esaki no tin sentido. Sr.Koole ta sigui splica cu dodenherdenking no ta pa esunnan di awo so, tin hopi hende cu a echt defende nan mes contra Alemania por ehempel y e hoben aki tin suerte cu e ta papia Hulandes. ”Si no ta pa e militar, e hoben aki tin hopi chens cu lo por ta papiando Aleman aworaki. Dus e mester tene cuidao kende e ta yama hipocrita pasobra mi ta sigur cu e ta stima di biba den un mundo liber. Si e bay papia den e manera ey na Pakistan nan ta caba cune dibiaha.” sr. Koole ta splica.
sr.Koole ta agrega cu e tampoco no ta de acuerdo cu e situacion actual na Siria pero e no ta asina facil pa motibo cu nos ta papiando aki di miyones di hende y masha hopi corrupcion entre otro na Washington y Damascus.
Como un di e prome Rubiano nan pa experiencia bida di militar den exterior, sr.Koole ta splica cu e programa di Formacion Social na Mariniers Kazerne ta algo cu seguramente ta hopi positivo pa comunidad di Aruba pa motibo cu hopi di e hobennan aki tin solamente dos opcion, esta KIA of riba caya. Sr.Koole tog kier a agrega cu tur respet si tin algun interes serio den servicio di militar pa bay acudi na Hulanda pasobra esaki lo yuda hopi si en berdad ta algo cu kier sigui den dje.
