Un ex- ingeniero di Google a wordo acusa diamars di horta tecnologia di auto autonomo for di e compania poco prome cu el a uni esfuersonan di Uber pa alcansa Google den e carera pa fabrica vehiculo robot.
E demanda entrega pa fiscal na San Jose, California, ta relaciona cu un demanda entrega na 2017 pa Waymo, un pionero den vehiculo autonomo cu a separa di Google. Uber a bay di acuerdo pa paga Waymo $245 miyon pa cera e caso aña pasa, pero e hues federal tratando e demanda a haci e recomendacion inusual di habri un investigacion criminal, despues di mira suficiente evidencia pa conclui cu un robo a tuma luga.
Uber kier fabrica vehiculo autonomo pa asina elimina e necesidad di un humano tras di stuur, un di e costonan mas grandi den su servicio di lift, cual ainda no ta genera entrada.
Anthony Levandowski, un pionero den vehiculo robot, a wordo acusa di 33 cargo di robo di secreto di industria. E por ricibi sentencia di te hasta 10 aña y un boet di $250mil pa cada cargo, den total $8.25 miyon.
Fiscal a bisa cu e demanda ta andando, pero nan no lo bisa si Uber y su antiguo CEO, Travis Kalanick, ta demanda. Fiscal a bisa cu Google y Uber a coopera den e investigacion.
Maske e enhuiciamento ayera no a acusa Uber, ta un mancha pa un compania cu ta purbando di recupera di un serie di scandal desde salida di Kalanick dos aña pasa. Ademas di purba di reverti percepcion cu e ta un ladron di tecnologia, Uber ta luchando cu acoso sexual, uzo di software diseña pa gaña reguladonan, y un encumbrimento di un atake di hacking cu a horta informacion personal di 57 miyon di pasahero y 600mil chauffeur.
Levandowski a ser acusa di horta añanan di informacion secreto di Google, cual fiscal ta bisa tabata e joyas di e compania. Esey ta inclui avansenan di Google den lidar, un piesa clave di tecnologia cu ta permiti vehiculonan autonomo detecta locual ta rond di nan.
Den un declaracion, abogadonan di Levandowski a mantene su inocencia.
Google tambe a entama un caso separa contra Levandowski den proceduranan di arbitrahe, cual a resulta den un panel dunando orden na Levandowski pa paga e compania $127 miyon, segun un revelacion di Uber.
