(France24) – Ex-hefe paramilitar Salvatore Mancuso, ken tabata comandante di Autodefensas Unidas de Colombia (AUC), a yega diamars ultimo 27 di februari na Bogota den un vuelo for di Merca, den cual a ser deporta despues cu a cumpli un condena pa narcotrafico na 2020, y a sigura cu ta bay obedece “condicionnan restrictivo” cu Husticia di su pais ta bay impon’e.
Mancuso di 59 aña, a yega den un vuelo di deportadonan cu a aterisa den Comando Aereo di Transporte Militar (Catam) di e capital Colombiano y awor mester presenta na Husticia pa un dozijn di crimen cometi durante e conflicto arma.
Den e prome imagennan di su deportacion, Mancuso ta aparece cu un bulletproof vest di Migracion Colombia rondia pa agentenan cu escudo antibala, entre e funcionarionan cu a ricibi’e tabata e director di e institucion ey, Carlos Fernando Garcia.
Mancuso, ken ta bay ser cera den e prizon La Picota di Bogota, ta bay keda na disposicion di e hues di ehecucion di sentencianan di Husticia y Paz di e capital Colombiano y di e magistrado di Control di garantia di Barranquilla, cu ta e autoridadnan competente pa tuma decisionnan riba Mancuso su libertad, segun Hurisdiccion Special pa Paz (JEP).
Mancuso a aparta su mes di e bida arma na 2006, igual cu e mayoria di integrantenan di AUC, grupo responsabel di e mayoria di crimen cometi durante e conflicto arma segun Comision de la Verdad.
Su desmobilisacion tabata despues di un negociacion cu Gobierno di e tempo ey a haci, Alvaro Uribe (2002-2010) ken a extradit’e pa Merca hunto cu 13 hefe paramilitar pa motibo cu nan tabata dedica na narcotrafico.
Na Merca, Mancuso a ser condena na 2015 pa 15 aña y 10 luna di prizon pa narcotrafico.
Sinembargo, na maart di 2020 e hues Mericano cu a sentenci’e a señala cu Mancuso a cumpli su condena debi na e dos aña cu e tabata cera na Colombia asina como tambe e otro añanan cu e tabata cera na Merca wardando pa un huicio.
Como parti di e acuerdo di AUC cu Gobierno, paramilitarnan a acepta e Ley di Husticia y Paz, cu tabata contempla castigo maximo di ocho aña di prizon na cambio di colaboracion pa aclaria crimennan.
Mancuso a participa den varios audiencia di JEP, den cual a duna informacion riba con AUC tabata haci e papel di “un porta” entre aparato militar y paramilitar den varios “patronchi di macro criminalidad” como desplasamento of ehecucionnan.
Pa e motibo ey, Gobierno Colombiano a sigura cu ta bay garantisa su siguridad, debi cu su bida por ta den peliger, segun minister di Defensa, Ivan Velasquez, pa e “aportenan” cu el a ofrece pa haya “e berdad” specialmente na JEP.
Den sentido ey, Mancuso den un carta publica diamars ultimo a sigura cu ta bay obedece y respeta “e condicionnan restrictivo” cu Husticia di su pais ta bay impon’e.
