(AP) – Autoridadnan Colombiano a libera ex hefe di cartel di Medellin Carlos Lehder riba dialuna despues cu hues a declara cu un sentencia pa trafico di droga duna den Colombia contra e homber di 75 aña a caduca.
Lehder tabata deteni diabierna anochi poco despues cu el a aterisa na aeropuerto di Bogota, cu oficialnan di migracion bisando cu te ainda e ta busca na e pais Sur Americano bao cargo di trafico di droga y arma.
Lehder a bira e prome traficante di droga Colombiano cu a extradita pa Merca despues cu el a keda deteni durante un fiesta na su rancho.
E ex traficante di droga a keda extradita pa Merca den 1987, unda el a cumpli mas di 30 aña den prison. Den 2020, Lehder a keda libera despues di cumpli dos tercer parti di su sentencia Mericano. El a keda deporta pa Alemania unda tambe e ta un ciudadano. E no a regresa Colombia desde su extradicion pa Merca. Su abogado, Sondra Macollins a bisa cu e tabata prubando bishita familiar ora cu el a yega diabierna. “E ta recuperando di cancer y tin problema cu su presion di sanger,” Macollins a conta Colombia su Blu Radio. “Nos ta papiando di un persona cu a pasa añanan den celdanan scur.”
Autoridadnan di Colombia a condena Lehder pa trafico di droga den 1995, mientras e tabata cumpliendo un sentencia separa na Merca. E hefe di cartel a keda sentencia na 24 aña den prison na Colombia, cual ta nifica cu su sentencia a caduca den 2019, segun ley di Colombia.
E yiu di un inmigrante Aleman cu a yega Colombia den 1920, Lehder a cuminsa su carera criminal den 1970 ora cu e tabata biba cu familiarnan na New York City.
El a usa su contactonan y su conocemento di Ingles pa habri mercado di cocaina pa e cartel di Medellin y a bira un aliado clave di su hefe Pablo Escobar. Lehder a cumpra tereno na Bahamas cu a bira un punto crucial pa vuelonan di cocaina. Na Colombia, e tabata doño di un hotel di luho conoci como Posada Alemania, cual tabatin leon den haula y un estatua grandi di Lehder su cantante faborito John Lennon.
Na Merca, Lehder inicialmente a ricibi un sentencia di cadena prepetua pero a logra reduci su sentencia pa medio di provee investigadornan di Merca cu informacion cu a usa pa persigui dictador di Panama Manuel Noriega.
