(AP) – Un ex-cientifico di data na Facebook a conta Congreso Mericano riba diamars cu e gigante di rednan social su productonan ta haci daño na muchanan, añadiendo cu e ehecutivonan ta nenga di cambia pa motibo cu nan ta pone mas balor riba ganashi cu seguridad. Y el a bisa cu e responsabilidad pa cu esaki ta cay riba CEO di Facebook, Mark Zuckerberg.

Frances Haughen, testiguando na e Subcomite di Proteccion di Consumidor di Senado, tambe a ofrece ideanan di con por yuda haci Facebook su plataformanan di rednan social mas sigur. Aunke e tabata hopi critico di e compania, el a nota cu e ta mira posibilidad di accion constructivo y a expresa sentimento di simpatia cu Facebook su dilema.

Haugen por ehempel a sugeri cu e edad minimo rekeri pa por traha un cuenta riba e aplicacion popular Instagram, por aumenta di e edad actual cu ta 13 aña, pa 16 of 18 aña di edad.

Papiando cu hopi confiansa na un audiencia, Haugen a acusa e compania di ta na altura di e daño causa na cierto hobennan di parti di Instagram, y di ta deshonesto den e lucha publico contra odio y mal informacion.

“Facebook su productonan ta causa daño na muchanan, promove division y ta debilita democracia,” Haugen a bisa. “E compania su liderazgo sa con pa haci Facebook y Instagram mas sigur, pero no ta haci e cambionan necesario pa motibo cu nan ta pone nan ganashi astronomico prome cu hende.”

“Accion di parti di Congreso ta necesario,” el a bisa. “Nan no lo resolve e crisis aki sin boso ayudo.”

Haugen a bisa cu mientras e compania publicamente a admiti cu e control di integridad tabata critico pa e sistemanan interno cu ta insta e uso di e usuarionan, el a fracasa den completamente lansa e material y instrumentonan pa por yega na control di integridad.

Den dialogo cu senadornan di ambos partido, Haugen, ken a enfoca riba productonan di e algoritmo durante su trabao na Facebook, a splica e importancia di algoritmo cu ta goberna loke e usuario ta mira pa e compania. Haugen a conta cu un cambio den aña 2018 di e contenido a contribui na mas division y mal intencion den un red crea pa trece hende mas cerca na otro.

Aunke e algoritmo nobo tabata creando hostilidad, Facebook a mira cu e tabata yuda mantene e usuarionan riba e plataforma, cual a bira e manera cu a yuda e gigante den red social bende mas aviso digital, cu ta loke ta genera e cantidad mas grandi di su ganashi.

E senadornan tabata di acuerdo cu esaki.

“E ta crea su ganashi a base di plama mal informacion y falta di informacion y creando odio,” Senador Richard Blumenthal, D-Conn., cabesante di e panel, a bisa. “Facebook su contesta pa cu e impacto destructivo semper ta keda na mas Facebook, nos mester mas Facebook, cual ta nifica mas dolor y mas placa pa Facebook.”