Ex- hefe di relacion internacional di Google a bisa ayera cu e gigante di buskeda a hal’e un banda despues cu el a lucha pa implementacion di un programa formal di derechonan humano na e compania.
Ross LaJeunesse, kende ta candidato pa Senado como un Democrata na Maine, tabatin un rol clave den ehecuta e decision di Google pa bandona e mercado di buskeda na China na 2010. E compania a bisa cu no lo censura resultadonan di buskeda na e pais, y e tempo ey, co-fundado di Google, Sergey Brin a cita e ‘totalitarianismo’ di gobierno Chines como un motibo pa retira di e mercado.
LaJeunesse a bisa cu atrobe el a haya su mes defendiendo derechonan humano na China despues cu el a haya sa na 2017 di un proyecto yama Dragonfly, un esfuerso pa trece un producto di buskeda censura bek na China. Como contesta, el a sugeri pa adopta un programa di derecho humano na henter e compania, cual publicamente lo compromete Google na cierto principio, como tambe permiti team di producto y ingenieria pa busca evaluacion di derechonan humano pa nan proyecto.
Pero cada bes cu el a recomenda un programa di derechonan humano, ehecutivonan senior a bin cu un excuus pa bisa no, segun LaJeunesse a bisa riba Medium. “E ora ey mi a compronde cu e compania nunca tabatin intencion di incorpora principionan di derecho humano den su decision di negoshi y producto.”
El a bisa cu el a wordo hala un banda despues di pusha pa e programa, y a asigna otro persona pa lidera e discusion di politica pa Dragonfly. LaJeuness, kende a cuminsa na Google na 2008, a bandona e compania na april segun The Washington Post.
Google a bisa: “Nos tin un compromiso fuerte pa sostene organisacionnan y esfuersonan pa derecho humano. E compromiso aki no ta vincula ni afecta pa reorganisacion di nos team di politica, cual a ser reporta ampliamente y a afecta cantidad di miembro di e team. Como parti di e reorganisacion aki, a ofrece Ross un posicion nobo na exactamente e mesun nivel y compensacion, cual el a nenga di acepta.”
Comentario di LaJeunesse ayera ta yega mientras Google ta pasa den turbulencia intenso. E compania ta bou investigacion anticonfiansa di oficialnan federal y estatal.
