Ayera mainta prensa local di Aruba a wordo invita pa haci un recorido den ex-edificio di DOW pa asina por mira den ki estado e edificio aki ta na e momentonan aki e cual tin 14 aña bashi desde cu DOW a muda na su edificio nobo, segun minister di Turismo y Salud Dangui Oduber a sigura.
Den un conferencia di prensa, el a informa cu debi cu e edificio a keda bashi, el a bay atras den ultimo tempo. Den cuadro di e proyecto di Aruba Port City cu gobierno a anuncia hunto cu Aruba Ports Authority (APA), “nos tabatin un pensamento teniendo na cuenta caminda e edificio actual di APA ta situa y cu ta forma parti di e proyecto aki, na dado momento APA lo mester a busca un edificio nobo sea construyendo un nobo of huur un cu ta existi caba. Den esaki nos a pensa den ex-edificio di DOW.”
Di esaki, el a splica cu tabatin conversacionnan entre gobierno, APA y Monumentenbureau pa wak kico tabata e posibilidadnan pa APA por tuma e edificio aki, por muda y haci di esaki su main office. Nan ta tuma na cuenta cu APA no tin hopi empleado pa por drenta den edificio aki su so e cual ta hopi amplio y door di esey nan a acerca Aruba Tourism Autorithy (ATA) pa asina ey puntra si nan tabatin interes di huur e otro parti di e edificio aki cu ta e parti di abou y lo bira un Visitor Information Center pa duna informacion na turistanan.
Igualmente nan a explora diferente escenario cu e edificio aki ta brinda na unda nan a prepara un draft Memorandum of Understanding (MoU) entre Gobierno di Aruba, Aruba Ports Authority, Aruba Tourism Autorithy y Monumentenbureau pa delinea kico exactamente nan ta desea di bay explora pa haci di e proyecto aki un realidad.
E intencionnan aki a wordo presenta na Conseho di Minister, ken a aproba esaki pa asina APA por tuma over e ex-edificio di DOW. Nan tambe a publica esaki den landscourant pa asina por motiva, argumenta y splica pakico gobierno a opta pa bay negosha cu APA y nan por tuma e edificio aki. Esaki a wordo publica ya caba dos siman pasa segun minister Oduber a declara, pa comunidad por tuma nota di e decision di gobierno pa negocia cu APA.
“E ta un edificio bunita, e ta monumental y nos deseo ta pa conserva esaki. E ta e prome impresion cu turistanan crucero ta haya ora di yega Aruba y nos no kier pa e edificio aki keda bay atras,” el a sigura.
Minister Oduber a expresa cu dentro di poco nan ta bay firma un MoU oficial entre e instancianan concerni den caso aki pa oficialmente nan cuminsa explora e posibilidadnan y tambe duna APA e espacio pa por busca financiamento pa cuminsa e proyecto aki. “Nos ta convenci cu nos lo por cuminsa e proyecto e aña aki ainda, esey ta e intencion, pa nos por firma MoU y despues bay over ora APA keda cla cu financiamento, pa asina pone e prome piedra y otro aña nos por tin un bunita proyecto conservando un monumento cu ta asina importante den area aki despues di 14 aña,” el a bisa.
Ronella Croes CEO di ATA a expresa cu nan tabatin e mira riba edificio aki for di varios aña caba, na unda ATA a traha y a analisa un posibel mudamento di nan oficina pa e edificio aki: “E tempo ey tabatin diferente motibo di pakico nos a scoge e edificio. E lo a permiti nos contribui cu e restauracion di un monumento na Aruba y nos a tene cuenta cu e hecho cu ta asina centralmente ubica permitiendo nos tambe pa facilita y duna miho servicio na nos bishitantenan, pero tambe lo a cuadra cu nos ekipo cu nos tabatin na e momentonan ey. No a concretisa esaki, pero e deseonan pa ta envolvi y e motibonan si a keda vigente,” Croes a comenta.
Den dje ta bay keda un oficina pa ATA caminda nan rekisitonan y exigencianan di kico tin mester ta diferente compara cu e tempo ey. Awor nan ta hopi contento di mira cu APA ta bay tuma e edificio over si tur cos bay manera ta planifica.
E lo permiti pa brinda na e bishitante di turismo crucero y turismo en general no solamente cu servicio personal, sino tambe haciendo uso di tecnologia. E aña aki nan punto di enfoke lo ta como tal pa traha riba e diseño di e Visitor Information Center y pa ora e edificio ta cla cuminsa cu e acuerdo cu APA pa huur e parti cu nan tin mester.
Di su parti, Mark Figaroa director di APA a señala cu esaki ta un oportunidad cu nan a evalua igualmente e otro instancianan pa asina wak e miho opcionnan cu por tin pa nan logra esaki: “P’esey awe nos ta para akinan seguramente pa wak e potencial cu e edificio aki tin y seguramente cu ta bay enhance the tourism product, pa nos specialmente e parti crucero cu ta sumamente importante,” el a bisa.
Tambe el a bisa cu APA ta trahando riba su cruise experience conhuntamente cu ATA pa asina nan por bay wak con Aruba por mantene su posicion den industria crucero den Caribe.
