ORANJESTAD – Incidentenan cu tin di haber cu aspecto di siguridad ta sigui tuma luga den nos instituto coreccionnan, esta KIA. Esun mas reciente a sosode den fin di siman, ora un caso di hincamento a sosode den e seccion di Jeugd. Despues di un razzia, a bin descubri cantidad di arma blanco den e seccion aki di KIA.
Pa ex director di KIA y actual parlamentario, Rocco Tjon (MEP) ta urgente pa KIA tin un director fiho pa atende debidamente cu e situacion cu ta surgi den e instituto aki. Tambe el a yega di tuma nota den prensa cu diferente incidente a yega di presenta den nos unico centro coreccionnan.
Obviamente e ta haya cu esaki ta regarda aspectonan di maneho. Sinembargo, e no ta na haltura di tur detaye, pero como parlamentario y presidente di e comision di husticia, nan lo haci diferente pregunta pa wak si e noticianan cu ta circulando rond ta cuadra cu realidad.
E ta kere si cu un director fiho di KIA lo yuda drecha e situacion, y esaki ta conta den cualkier organisacion. E ta fundamental, ya cu e ora ey tin claridad pa e personal. “Mi ta kere cu un cos hopi importante pa KIA ta eleva e siguridad interno,” el a bisa.
Pero tambe pa percura pa mas hopi programa pa detenidonan por wordo organisa. El a indica cu ta cientificamente comproba cu mas hopi actividad bo brinda na e detenidonan, e ta contribui na e clima di siguridad den prizon tambe.
P’esey instancia internacional ta haci enfasis pa bin cu e tipo di programa aki pa e detenidonan cu ta contribui tambe den su proceso di socialisacion den futuro. Pa locual ta trata personal, e ta kere cu unabes KIA tin un director fiho, e plan di formacion den e instituto aki, cu ta inclui structura salarial, funcionnan nobo, etc. por keda concretisa.
“Mi ta kere cu esaki tambe ta un aspecto cu ta importante pa personal cu ta traha den KIA,” Tjon a declara na Bon Dia Aruba. Ya cu ta obvio cu mas motiva bo personal ta mas miho bo organisacion ta draai tambe.
E tin cu bisa cu durante e tratamento di presupuesto, minister di husticia, Andin Bikker, a duna di conoce cu tin diferente proyectonan canando aworaki den KIA y cu pronto lo wordo cristalisa. Informacion cu parlamento a haya, ta cu esaki ta den e fase final. Nan ta proyectonan na corto plaso, cu ta yuda mehora e circunstancianan di e detenidonan na KIA.
Un proyecto na largo plaso y cu e ta considera uno ‘realistico’ pa yega na un KIA nobo.
Dialuna ultimo, Bikker a duna di conoce cu e proceso pa selecta un director nobo pa KIA a conclui, y cu pronto lo keda conoci kende lo tuma e rienda di e instituto aki.
