Dia 22 di october reportero di Bon Dia Aruba a asisti na un conferencia di prensa di minister di Salubridad y Turismo, Dangui Oduber na unda el a haci un par di pregunta tocante caso di supuesto falsificacion, legalisacion y benta di certificadonan di vacunacion contra Covid-19.

E prome pregunta dirigi na minister Oduber tabata tocante ki pasonan minister lo tuma si un persona ta falsifica e carchi di vacunacion? El a contesta: “Mi ta kere cu na momento cu tin un melding cu un carchi di vacunacion ta wordo falsifica, consecuentemente un investigacion interno lo mester tuma luga y tambe un keho lo mester wordo entrega si esey ta e caso cu un hende ta wordo gara cu un carchi falsifica di vacuna.”

Di dos pregunta cu redactor a haci na minister Oduber, ta berdad cu tin un investigacion andando contra un coordinador di minister cu a wordo kita for di DVG Post di aeropuerto bao sospecho di falsificacion, benta y legalisacion di e documento aki riba Aruba Health App? Unda cu primeramente minister Oduber a declara na Bon Dia Aruba cu “tur hende cu ta traha cu mi riba mi ministerio ta traha riba mi ministerio. Nos no tin niun hende cu ta traha riba ministerio y ta haci otro trabao riba otro luganan como aeropuerto. Ami no ta conoce cu un hende cu ta traha cu mi riba mi ministerio ta traha na aeropuerto y ta bao investigacion.” Consecuentemente un otro periodista di otro medio di comunicacion a bin dilanti puntrando si den caso aki e persona tabata traha na un otro luga cu no ta su ministerio, sino den otro departamento como por ehemplo, DVG of otro caminda, y si ta berdad cu tin un investigacion andando. Oduber a contesta di manera precies cu “si, nos por confirma cu tin un investigacion andando y e investigacion lo mester cana su caminda prome cu nos lo duna mas informacion di e caso specifico aki”.

Den luna di augustus ultimo aproximadamente, un fuente a acerca na un reportero specifico di Bon Dia Aruba na unda cu el a bati alarma riba e caso aki di supuesto falsificacion, legalisacion y benta di certificadonan di vacunacion contra Covid-19. Tur cos a cuminsa cu ora a ricibi e certificadonan di National Institute for Public Health and the Environment for di Hulanda tabatin un discusion fuerte den ministerio di Salubridad, unda nan debati si nan tabata laga print serial number riba e carchi pa por tin mas control di dje den futuro, e decision a cay cu solamente ta print e parti di atras cu preguntanan medico pa cu vacuna di Covid-19, den idioma Papiamento.

Tambe el a señala cu un lote di carchi di vacunacion a ser perdi hunto cu un par di roll di stickernan di Pfizer- BIONTECH; e lote di carchi cu Aruba a haya ta solamente un number tin riba dje cu ta 012566, cu ta identifica cu e carchi ta di Aruba.

Ademas e fuente aki a splica na e reportero specificamente con e proceso a bay y cu ta haci casi imposibel cu por trace back e lote di carchi cu a ser perdi. Dden esaki tabata dos coordinador y campañador cu a forma parti di “TEAM D” di minister Oduber, cu a cuminsa haci actonan sospechoso na DVG Post di aeropuerto y na mesun momento nan a wordo hala. Un di e sospechosonan pa Husticia na e momentonan aki, cu a keda deteni par di dia pasa, a ser poni na prik post di DVG (ex-Landslaboratorio) caminda cu eynan e tabatin acceso na e database di vacunacion, unda aparentemente e tabata falsifica y legalisa e carchinan riba Aruba Health App.

Segun informacion e persona aki supuestamente tambe tabata hiba e laptop di dienst cas, na unda cu e por a cambia y maneha informacion.

Pa finalisa, segun un otro fuente den caso aki ta papiando di mas o menos 3.000 carchi di vacunacion cu a wordo bendi na un suma di placa basta cuantioso.