For di luna di februari di e aña aki, Aruba a conoce e noticia cu e coordinador di anterior Ministerio di Husticia, esta Jason Margarita, a keda deteni pa motibo cu e tabata envolvi como sospechoso den un caso di abuso di un mucha menor di edad.
Ayera hues den prome instancia durante un video conferencia a duna sentencia na Margarita despues di varios luna di investigacion, na unda cu el a hay’e culpabel di tene relacion sexual y comete acto inmoral cu un menor di edad.
Abogado di Margarita, Zuhaila Arends-Marchena a declara cu hues a tene cuenta cu Margarita “no tabata e persona cu a inicia e actonan” y cu tampoco “e no tin indicacion cu ta un pedofiel”.
Ta trata di un mucha muhe di 15 aña cu tabata traha den e gym propiedad di Margarita y su casa, cu segun Arends Marchena a bisa, “e mester tabata sa miho cu Margarita ta un adulto y esey ta loke a hiba tambe e sentencia aki”.
El a anuncia cu lo sinta studia e veredicto hunto cu su cliente Margarita, pa analisa si nan ta bay apela e decision of no.
