Ex-diplomatico Dominicano na Aruba, Delia Josefina Ortiz a bira pre-candidato presidencial di Partido Revolucionario Moderno (PRM). Despues lo bin un proceso interno pa dicidi si Ortiz lo bira e candidato oficial y unico di PRM den eleccion presidencial proximo.
Asina a keda anuncia oficialmente siman pasa durante un reunion na Hotel Suite Colonial by Cristi na Santo Domingo, unda el a duna di conoce su slogan na Spaño: “Si No Es Ahora Cuando Y Si No Soy Yo Quien?”
E reunion aki a conta cu asistencia di dirigentenan di PRM, famianan y amigonan di e candidato Ortiz, kendenan a apoya su decision pa bira presidente di Republica Dominicana. Ortiz a nace na Descubierta, municipio di Constanza, Provincia La Vega.
Delia Josefina Ortiz ta abogado y psicologo clinico. El a haci un maestria den Educacion, Diplomacia y Derecho Internacional. Tambe el a haci un specialisacion den terapia di famia y sexualidad. Na aña 2000, Ortiz a eherce su funcion di consul Dominicano na Aruba, unda el percura pa atende e necesidadnan mas urgente di e comunidad Dominicano.
Den su discurso di lansamento oficial di su pre-candidatura di PRM, Ortiz a papia di unificacion, integracion y participacion. E ta haya cu un pueblo uni ta bira mas fuerte y miho. Igualmente e ta haya cu su pais mester duna participacion na nan yiunan di tera mas talentoso pa asina compromete nan mes cu e desaroyo di Republica Dominicana. Tambe pa nan duna nan contribucion pa nan pais y partido pa confronta e retonan y necesidad di Republica Dominicana.
Ortiz a declara su preocupacion riba e maneho migratorio di nan pais. “Si no enfrenta e migracion cu un plan di maneho eficiente, den 20 aña nos por ta colonia di Haiti”, el a bisa categoricamente.
E eleccion presidencial ta tuma luga cada cuater aña na Republica Dominicana. E proximo eleccion lo wordo celebra na aña 2024.
