(AP) – Rodrigo Granda, un ex-comandante di guerrilla Fuerza Armada Revolucionario de Colombia (FARC) y senador actual a ser deteni na Mexico despues di haya un notificacion di Interpol, den un accion cu algun di su compañeronan a califica como un violacion na e proceso di paz di e pais sur Americano.
Un funcionario federal, ken a discuti e caso bao e condicion di no duna su nomber, diamars ultimo den oranan di anochi a confirma na The Associated Press e detencion di Granda, aunke el a evita di duna mas detayenan.
Sinembargo, despues e minister di Defensa Diego Molano a señala riba su cuenta di Twitter cu e aresto di Granda a tuma luga pa via di un circular cora emiti pa Paraguay pa delitonan di secuestro, asociacion criminal y homicidio. E funcionario no a menciona cu e detencion a sucede na Mexico y a agrega cu Interpol Colombia no por modifica of cancela solicitud di otro paisnan.
Carlos Antonio Lozada, senador di e partido funda pa e guerrilla desaparecido aki a informa oficialmente cu Granda a ser deteni na Mexico aunke tabatin un autorisacion di Jurisdiccion Especial de Paz (JEP) Colombiano.
Debi cu Granda ta un persona cu tabata presente y a firma pa e acuerdo di paz cu gobierno, el a haya su permiso di JEP, e tribunal encarga di husga e echonan di conflicto di Colombia, segun a keda constata den un acuerdo firma pa tribunal y a ser publica pa prensa diamars ultimo.
Senador Lozada a bisa cu ta trata di e prome caso cu un persona firmante di acuerdo di paz cu a presenta na tribunal di paz a ser captura na stranhero.
Den un video publica riba su cuenta di Twitter, Rodrigo Londoño, ex-hefe di FARC y lider actual di e partido politico cu a substitui e guerrilla mas grandi di Colombia, a bisa cu Granda tabatin un autorisacion pa asisti na un seminario organisa pa Partido de Trabajo de Mexico y cu un di e topiconan cu lo a trata tabata e proceso di paz na Colombia.
