(TheDailyHerald) – Entre mei y augustus 2022, Lathasha Mills a horta mas cu 115,500 dollar di placa di impuesto tempo cu e tabata hefe di cahera na Ontvanger.
Riba diahuebs, Corte di Prome Instancia a ordena su persona paga henter e suma back y a sentenci’e cu 240 ora di servicio na comunidad, cu di 1 aña den prison condicional.
“Mi ta pidi disculpa pa loke mi a haci,” Mills a expresa na Corte, cu lagrima durante su huicio diahuebs. “Mi no tabatin ningun motibo pa haci esaki. El a djis pasa.” Como hefe di cahera, e residente tabata responsabel pa sigura cu e placa tabata di acuerdo cu e pagonan cu a ser haci y cu a ricibi durante e dia. Tambe e tabatin e tarea di warda e placa na final di su proceso. Na luga di esaki, e tabata hinca placa den su cartera prome cu e sali for di trabao.
Investigadornan a conclui cu Mills a haci esaki mas o menos 3 biaha pa siman, tumando 2,800 dollar cada biaha. Departamento di accounting di SOAB despues a determina cu e robo a yega un suma total di $115,563.21 durante e periodo di 4 luna.
Mills a admiti e robo dia 30 di augustus den 2022 durante un reunion cu el a pidi cu su superiornan. Esaki tabata alrededor di tempo unda un empleado di oficina di impuesto a entrega un keho tocante placa perdi. Mills a bisa hues cu e no ta corda ki el a haci cu e placa horta, pa motibo cu durante e tempo aki e tabata sufri di blackout. El a conta cu e momentonan aki di amnesia tabata causa pa e stress intenso bao cual e tabata pa motibo di problema familiar na cas.
Hues a considera cu e storia aki ta dificil di kere y a puntra si ta posibel cu el a hunga wega di placa cu e suma aki y a perde tur e placa.
