Dia 8 di januari ultimo tabatin sentencia den caso di un funcionario publico contra Gobierno di Aruba, den cual segun e documento ta indica, na mei 2022 a impone un sancion disciplinario contra Kinsasha van der Bliek, ex-candidato di partido RED.

Hechonan

Mediante un decreto ministerial di 7 di juli di 2018, ex-minister di Enseñansa, Ciencia y Desaroyo Sostenibel hunto cu Minister di Husticia, Seguridad y Integracion a dicidi di pone Kinsasha van der Bliek na disposicion di gabinete di minister di Enseñansa, mientras Gabinete Wever-Croes I tabata permanece den Gobierno.

Dia 20 april 2021, Van der Bliek a haci un publicacion unda por a tuma nota cu e tabata huma “algo.”

Dia 18 di augustus 2021, Van der Bliek a ricibi un carta na unda a pidie pa contesta por escrito e supuesto incumplimento cu el a comete. Van der Bliek a contesta e carta dia 24 di september 2021.

Mediante e decreto nacional di 25 di mei 2022, gobierno a dicidi impone un sancion disciplinario, na unda tabata acusa Van der Bliek di a publica “Live” un video riba rednan social, den cual ta parce tabata cende y huma un sigaria similar na un joint di marihuana. Den e video ta anima su siguidonan of esnan cu tabata wak e live pa uni na e “revolucion” y no obedece.

Pa orden di 27 di juli 2022, presidente di Beoordelingscommissie Vrijwillige a dicidi duna na Van der Bliek e retiro cu efecto for di dia 1 januari 2023.

Gobierno di Aruba su argumento

Gobierno mediante decreto nacional ta rechasa e hecho cu pais Aruba y CEA tin un politica di cero tolerancia pa loke ta trata consumo y posesion di estupefaciente y cu su consumo publico, promocion y e accion di fomenta cannabis no ta permiti. Gobierno ta hibando un lucha dificil y intenso contra produccion y trafico di estupefaciente. A pesar cu den e grabacion no por a determina cu exactitud kico ta loke tabata haciendo cu un papel di huma y cu tambe tabata falta di e holo di cannabis, e conhunto di hechonan ta demostra cu Van der Bliek ta humando cannabis, of por lo menos, esey e tabata kier mustra den e video, segun gobierno a argumenta.

Den bista di e gravedad di e infraccion cometi, gobierno no ta considera desproporcional e medida di sancion disciplinario cu a impone contra Van der Bliek. Tambe a bisa cu nan no tabatin interes di impone e recurso, ya cu a dun’e un onstlag di e funcion publico for di 1 januari 2023.

Kinsasha van der Bliek su argumento

Van der Bliek no por tabata di acuerdo cu e sancion imponi y a nenga cu e tabata huma cannabis den e video Live di 20 di april 2021. Eel a argumenta cu e tabata fingi cu tabata huma un “joint.” Tabata un aña electoral na Aruba na 2021 y na e momento ey, Van der Bliek tabata candidato di partido politico RED, cu tabata promove y defende legalisacion di uso medicinal di cannabis.

Igualmente, el a sostene cu e no a haci nada ilegal si el a yega di promove of haci impulso e consumo di cannabis, el a eherce su derecho na libertad di expresion. Van der Bliek ta kere cu si tin un interes di demanda, maske cu el a bandona boluntariamente su trabao di forma anticipa, awor cu ta existi e opcion di bay su trabao back cu gobierno despues di cinco aña, si e decreto nacional ta mantene, e no lo tin posibilidad di bay traha back.

Marco huridico

Segun articulo 4, inciso 1 di Landsverordening verdovende middelen (Lvm) ta prohibi: blachi di coca, hennep su simia y blachi si no ta acompaña di hennep y loke ta prepara cu nan incluyendo hashish, esrar y djamba.

Ademas di cultiva, prepara, procesa, bende, entrega, suministra of transporta, posee, presenta of emplea, fabrica, incluyendo refinacion (raffineren) y transformacion.

Di conformidad cu articulo 47, inciso 1 di Landsverordening materieel ambtenarenrecht (Lma), funcionarionan ta obliga di eherce su funcion cu consenshi y diligencia, ademas di comporta su mes manera ta coresponde na un bon funcionario publico.

Di conformidad cu articulo 82, inciso 1, tur funcionario cu no ta cumpli cu su obligacionnan of lo comete negligencia lo por ta obheto di medidanan disciplinario di parti di e autoridad competente.

Segun articulo 83, inciso 1 cu letter i, e retiro di trabou por ser aplica como sancion disciplinario, segun paragraf cuatro, na ora di impone un sancion lo por determina cu esaki no ta aplica si, durante periodo cu ta determina impone e sancion, no por surpasa e tempo di dos aña, e persona interesa ta culpabel di e no cumplimento di deber pa e cual e sancion ta ser imponi ni di ni un otro incumplimento grave di su deber y ta cumpli cu condicionnan special cu por impone ora ta aplica e sancion.

Evaluacion di hues

Maske Van der Bliek a bandona boluntariamente su trabou, e por bay back na su trabou despues di cinco aña. Tambe a confirma cu gobierno den e caso ta indica cu un sancion disciplinario ta permanece den Van der Bliek su file personal y lo por afect’e negativamente den futuro si e lo kier bay back den servicio publico.

E huicio ta basa si gobierno a haci bon di impone un sancion disciplinario di retiro condicional di trabao pa incumplimento grave di su obligacion, pa lo cual corte ta considera cu:

Segun un hurisprudencia, pa constata e no cumplimento di Van der Bliek su debernan pa por duna luga na imposicion di un sancion disciplinario, ta necesario cu, riba e base di datonan disponibel y debidamente estableci, lo yega na conviccion cu e funcionario aki a comete un conducta di e cual e ta acusa.

E consumo di cannabis no ta ser discuti ya cu ta contra e articulo 4, inciso 1 di Landsverordening verdovende middelen (Lvm). Ta evidente cu 20 di april di ta Dia Internacional di Marihuana y cu Van der Bliek a duna e impresion cu tabata huma un join di cannabis y tambe a haci comentarionan riba su legalisacion na Aruba, corte ta considera cu no tin suficiente pruebanan cu Van der Bliek tabata realmente humando cannabis, sinembargo, tur ta parce indica cu si e tabata haciendo esey, cu su conducta, el a stimula of fomenta consumo di cannabis, y por lo tanto esey ta contra ley.

Ora el a hacie segun corte, e no a comporta su mes manera ta coresponde pa un bon funcionario publico y gobierno tabatin derecho di impone un sancion disciplinario na Van der Bliek.

Sinembargo, esey no ta suficiente grave como pa impone un sancion disciplinario di retiro di trabou, aunke ta condicional. A tene na cuenta cu e tabata pertenece na e momento ey na un partido politico, cu ta haci impulso di legalisacion di cannabis, por lo tanto su conducta mester considera como parti di su actividadnan politico y ehercicio di libertad di expresion cu den e limitenan, tambe ta coresponde na funcionarionan publico.

Den circunstancianan aki e sancion disciplinario di retiro di trabou condicional imponi por considera desproporcionalmente duro.

Hues W.C.E Windfield a anula e decreto nacional

Riba rednan social Kinsasha van der Bliek a reacciona:

“Despues di 1 aña warda pa mi uitspraak, Hues a dicta den mi fabor. Bula na laira sacudi mi Rasta, Saca bo candela mustra nan cu bo no ta chichi. Mustra nan cu bo ta esun cu niun hendenan ta mishi, wak nan lenga, colebra, lagadishi . Tur ora mi ta na bo mas cos di papia, bira mi lomba pa bo wak mi RASTA Wak ki ta pasa ora mi presenta, lo mi semper mustra mi cara, na laira Legalisa nos medicina Legalisa cannabis.”