Net un aña pasa, un grupo di alrededor di 44 trahadonan di Aura Casino a keda den un incertidumbre laboral. E operador di e casino a baha bay lagando e trahadonan pa nan cuenta. Awe despues di 12 luna di diferente acontecimento tin un luz na final di e tunnel: E casino situa na Hotel Barceló Aruba ta bay habri.
E siman aki lo wordo firma un acuerdo entre e diferente partido pa facilita e operacion di e casino aki den man di e compania Island Gaming Aruba. E compania aki ta afilia na un compania Canades cu ta un operador grandi internacionalmente, y cu hopi experiencia den e mundo casino aki. Pa logra e acuerdo aki gobierno di Aruba tambe tin su participacion.
Desaroyo
No tabata facil pa yega te na porta di firma pronto e acuerdo aki, caminda e cuater partidonan envolvi, entre nan gerencia di Hotel Barceló y sindicato FTA tambe, lo percura pa traha conhuntamente na interes di tur e partidonan envolvi; y asina traha riba e solucion di asuntonan ainda pendiente.
E caminda pa finalmente facilita e operacion aki a confronta tur sorto di dificultad y situacion dificil pa e mesun trahadonan di Aura Casino. E trahadonan a yega di manifesta pa expresa nan malcontento dilanti di Bestuurskantoor. Considerando nan situacion dificil a wordo inclui den e ley pa fortalece e seguro di malesa y accidente administra pa SVb, un amienda pa facilita no solamente e pago di cesantia di e trahadonan; pero pa no castiga nan cu belasting. Di e forma aki e trahadonan por a hala un tiki di rosea financieramente papiando.
Durante e aña aki tabatin operador interesa, sinembargo semper tabatin discusion cu e sindicato cu ta representa y defende e derecho di e trahadonan a base di e articulo 1615db di Codigo Civil. E articulo aki ta stipula cu den caso di un ‘overgang’ (traspaso) di un empresa, di un dunado di trabao pa otro, pa ley (‘van rechtswege’) e obligacionnan pa cu e trahadonan ta pasa pa e dunado di trabao nobo cu ta bay opera e empresa. Pa ehempel, e punto di salario retroactivo for di december ultimo cu Aura Casino a cera su porta, tabata un punto di discusion cu e sindicato tabata defende. Pero un carga pisa pa cualkier operador cu lo tabata desea di inicia e operacion di e casino, vooral riba un mercado cu tin su propio retonan.
Na principio di november ultimo e negociacion entre e operador nobo y sindicato FTA a sufri un crisis pisa, despues di un caso den Corte. E operado cu lo kier a tuma e casino a informa e sindicato cu ya nan no ta interesa mas. For di inicio e operador a yega di bisa cu nan no por tuma tur e 44 trahadonan pa motibo cu espacio di e casino a bira mas chikito. Pero di otro banda tabata pendiente e parti di e salario atrasa den cual legalmente cualkier operador of dunado di trabou cu ta drenta nobo, ta carga e responsabilidad ey.
A pesar di e decision di e operador nobo y su disolucion pa opera e casino, e partinan envolvi a dicidi di fria cabes pa evalua tur posibilidad, y si tabata posibel basha awa riba biña pa asina pone den operacion Aura Casino. Specialmente riba puntonan clave manera e cantidad di trahadonan cu nan lo tuma na servicio y si nan lo por yega na un acuerdo riba asunto di salario. Ainda no ta conoci e contenido di e acuerdo aki cu lo wordo firma e siman aki.
