(NLTimes) – Alcalde anterior di Amsterdam y anciano prominente di partido PvdA, Ed van Thijn a fayece riba diadomingo na e edad di 87, e municipalidad di Amsterdam a anuncia riba peticion di e famia.

Nan a bisa cu Van Thijn a permanece alerta te na final. “Lucha contra racismo tabata e motibo mas importante pa mi drenta politica, y por ultimo bira alcalde di Amsterdam,” Van Thijn a expresa tocante su motivacion.

“Van Thijn a guia Amsterdam durante periodonan turbulento, di protesta te e desaster di Bijmer, husticia y ley tabata semper su principionan primordial. Mi ta admira su persona profundamente pa esaki,” alcalde actual di Amsterdam, Femke Halsema a bisa despues di e fayecimento di Van Thijn.

Pa hopi aña largo, e tabata un director prominente den nomber di PvdA y Minister di asuntonan Interior pa dos periodo. Tambe el a eherce e rol di formador, informador, y lider di e partido PvdA den Tweede Kamer. Van Thijn tabata e alcalde cu a sirbi pa e periodo mas largo den e capital despues di e di dos guera mundial for di 1983 te cu 1994. Despues, e tabata miembro di Eerste Kamer desde 1999 te cu 2007.

“Amsterdam ta perde un anker, e partido PvdA un icono, y Hulanda un politico y administrador cu a demostra den su bida y su trabao cu semper e ta bal la pena pa defende otro, y keda cu speransa pa un miho futuro,” lider anterior di PvdA Lodewijk Asscher a skirbi den un tributo riba e website di e PvdA.

Despues di a sirbi como alcalde, a nombra Van Thijn como Grand Officer den Order of Orange-Nassau y a ricibi e medaya di oro di e ciudad Amsterdam.

“Cu dolor pa e morto di Ed Van Thijn,” Prome Minister Mark Rutte a publica riba su red social Twitter. “Mi ta duna respet pa su gran compromiso den varios posicion pa cu su partido y su pais. Como alcalde, el a guia nos capital durante temponan turbulento. Mi ta desea su famia y amistadnan hopi forsa pa e gran perdida aki,” Rutte a expresa.

Van Thijn, ken a nace riba dia 16 di augustus den aña 1934 na Amsterdam. Como un mucha, el a sobrevivi e Westerbork camp. Despues di a completa su estudionan den Ciencia Politico y Social, el a cuminsa traha na e oficina cientifico di PvdA, e Wiardi Beckman Foundation den aña 1961.

Su funeral lo tuma luga den un circulo chikito despues di Pasco.