Morales ta na Argentina. Seis dia despues di biaha pa Cuba pa asisti na un consulta medico desde Mexico, unda e tabata permanece cu condicion di asilo desde 12 di november, e ex-presidente Boliviano a aterisa na e pais cu tin Alberto Fernandez como lider recien.
E persona encarga di confirma e yegada di e politico di 60 aña tabata Felipe Solá, minister di Exterior Argentino, ken a indica cu el a drenta mesun cos cu na Mexico, den calidad di asilo, pero cu lo adelanta e proceso pa keda como ‘refugiado’. Ademas a informa cu su traslado a produci den compania di su ex vice-presidente Álvaro García Linera, ex-canciller Diego Pary Rodríguez y ex-minister Gabriela Montaño.
Durante e anuncio di su yegada, Morales a publica riba su cuenta di Twitter cu lo continua cu su lucha pa uni e Bolivianonan y cu ta sigui ‘fuerte y anima’.
Desde e momento cu e portavos di Exterior di Mexico, Roberto Velasco a anuncia e salida di Morales di Ciudad di Mexico, varios fuente tabata adverti cu e lider di Movimiento al Socialismo (MAS) tabatin plania instala na Argentina unabes cu Fernandez a tuma e funcion di presidente dia 10 di december.
Despues cu Fernandez a tuma e funcion di presidente, Morales a felicita y a sigura cu su yegada na poder a representa e regreso di e ‘speransa’.
Ta trata di dos biaha cu Evo ta pidi asilo na Argentina despues cu un luna y mey pasa, e presidente na e momentonan ey Mauricio Macri a nenga esey. Ainda ta desconoci cua lo bay ta e luga di residencia cu lo duna p’e y tampoco tin planea un reunion cu Fernandez den e oranan proximo.
