siguridad area turistico (1).jpg

Minister di Husticia, sr. Arthur Dower a revela na Bon Dia Aruba cu por ta nan no ta bay haci uzo por ta di e fondonan di ATA pa trece mas siguridad den e area hotelero y turistico di nos isla. Esaki ta debi cu e disponibilidad di e fondo aki ta treciendo polemica cune, ya cu apesar cu nan a bin cu mas polis, ta wordo treci un confusion den comunidad riba aspecto di siguridad den e area aki.

E mandatario Dowers a declara cu e tempo aya nan a palabra cu ta wordo poni 20 polis adicional den e area hotelero; y nan a pone no 20 sino 25 polis adicional den e area turistico, y nan a haya e suma di 700 mil florin anual pa sostene e polis den material.

Esaki ta trece cun’e cu nan a aumenta e presencia di polis den e area aki, pero nos tin cu realisa cu e ta un area cu a crece ultimo aña considerablemente.  “A bin mas negoshi, mas actividad nocturno y a bin mas risico den e area aki”, segun e mandatario. El a agrega cu unda tin risico mester percura cu cada bes cu e risico ta aumenta tin medida cu por tuma cu por reduci e risiconan.

Responsabilidad mas grandi

No mester desconoce cu nos ta un pais turistico completo y no manera Jamaica of Republica Dominicana, unda nan area turistico ta limita. Pero considerando cu henter nos isla ta turistico, pues e responsabilidad ta mas amplio y compleho.   “Cualkier persona cu tin poco sentido comun ta comprende cu e ora ey e trabou y responsabilidad cu nos tin ta mucho mas grandi cu un pais manera Rep. Dominicana of Jamaica”, el a laga sa.

Apesar di tur circunstancia e ta haya cu Aruba ta un pais bendiciona y no manera otro pais caminda e turistanan no mag di Sali for di hotel pa motibo di insiguridad. Pero e ta admiti cu cosnan riba tereno di insiguridad cu nan no ta contento cune.

E mandatario ta lamenta cu tin criticanan cu ta wordo lansa pero den su concepto algun di e personanan cu ta bin cu e criticanan aki  no tin un stimacion pa atende cu esnan cu ta den problema. E ta haya cu tin hende den nos comunidad cu no a saca un dede  berdaderamente pa preveni cu nos muchanan cay den gara di delincuencia.