Diaranson mainta, Departamento di Asunto Social (DAS) a tene un evento informativo titula “Ban Conecta”, specialmente enfoca pa scolnan p’ariba di brug, caminda diferente instancia cu ta traha cu mucha y hoben rond di Aruba a brinda informacion na tur scol presente durante e evento aki.

Jesseline Kelly, vocero DAS, a splica durante un conferencia di prensa cu medionan local presente, cu e evento informativo ariba tereno social ta specialmente dedica na tur e scolnan p’ariba di brug. Esaki, el a indica ta un iniciativa cu a nace di un team organisatorio sumamente activo. “Nos sigur di departamento ta sumamente orguyoso di e trahadonan social y e stagiaire y trahadonan preventivo, tur cu a haci e mainta aki posibel”, el a expresa.

Segun Kelly a indica tur scol di p’ariba di brug tabata presente caminda cu nan a haya informacion di tur instancia social cu a registra, manera Bureau Sostenemi, Directie Voogdijraad, Bureau Traimerdia, Codigo di Proteccion entre otro.

El a remarca cu DAS ta desea di continua cu tipo di eventonan asina pa asina por tin bon conexion cu tur e scolnan. Esaki ta e prome evento di “Ban Conecta”, pero nan ta premira cu den futuro lo tin hopi mas evento similar na esaki.

Pa e prome edicion di “Ban Conecta” nan a cuminsa cu e prome grupo cu ta e scolnan p’ariba di brug, pero Kelly a sigura cu e meta ta pa bay pabao di brug tambe y asina continua den futuro.

El a subraya cu e evento no tabata solamente un mainta informativo, pero tambe tabatin un panel caminda cu durante e mainta na momento cu e scolnan a ricibi informacion, nan por a nota nan pregunta, duda of cualkier preocupacion y durante e panel aki nan tabatin e oportunidad pa haci pregunta na unda tur e instancianan cu a duna informacion tabatin e oportunidad pa contesta e preguntanan aki.

Natalie Vorst, trahado social na DAS y un di e organisadornan di e evento aki a conta cu e idea pa e evento informativo aki a nace na momento cu ocho luna pasa el a ricibi un stagiaire hopi dinamico for di Colegio EPI cu ta den su afstudeer fase y pa esaki e mester a organisa un actividad y entrega un proyecto.

Mirando cu Vorst como trahado social pa hubentud ta bishita scolnan regularmente tin tur e informacion pa locual ta nan preocupacionnan cu ta pasa diariamente dentro di scolnan y tambe preocupacionnan for di e veld social, hunto cu su stagiaire nan sinta y duna bida na e evento special aki.

“Mi a sinta cu mi stagiaire, caminda cu awe mainta nos a pone e actividad aki hunto na unda cu manera a wordo menciona caba, nos tin tur e scolnan di p’ariba di brug y diferente instancia cu ta traha pa e muchanan”, el a indica.

Esaki, Vorst a señala, no ta e prome comienso. El a remarca cu DAS semper a y ta yuda famianan cu ta solicita ayudo of nan mes ta acerca nan y asina di e forma aki nan kier sigui aporta na comunidad, pasobra nan como departamento sa con e problematica ta.

“Nos sa tambe cu tin biaha tin hende tin berguensa of miedo pa busca ayudo y nos kier pa nan sa cu nos t’ey pa nan y conhuntamente nos por haci esaki, nos no por haci esaki nos so”, el a agrega.

El a remarca cu for di comienso di aña nan a cuminsa pone mas atencion pa cu violencia cu tin den comunidad. Esaki, el a indica, ta cosnan cu ta bin ta pasando durante añanan caba, pero mas awo cu e ta birando un “hype” hopi negativo, pasobra e tin su consecuencianan y esaki ta brota hopi biaha for di locual ta pasa den famia pa cu muchanan.

Vorst a subraya cu tin biaha e violencia cu ta tumando luga na cas ta drentando den scolnan, ta drentando den comunidad. El a expresa cu nan ta na un punto cu aworaki cu nan ta sinti cu nan no tin control riba esaki. Pero el a sigura cu nan no kier perde bista y kier conscientisa pueblo completo. “Hunto nos por logra algo cu nos ta yega na un punto cu e ola di violencia cu ta pasando no ta asina halto mas”, el a bisa

E obhetivo principal di e evento “Ban Conecta” ta pa hiba esaki na otro scolnan di Aruba tambe. El a splica cu tres diferente OPC, tin e OPC di Oranjestad, OPC di Noord y OPC di San Nicolas, y tur ta traha riba un liña, pero e scolnan ta hopi y no por a pone tur hende den un solo evento. Nan a cuminsa cu p’ariba di brug y lo sigui amplia esaki.

Arvice Dijkhof, stagiaire na DAS y organisador di “Ban Conecta” a conta cu e iniciativa pa e evento aki a sali di su mes, hunto cu su colega, Natalie Vorst. Como stagiaire e mester a organisa un evento pa su afstudeering y ya cu Vorst ta bishita hopi di e scolnan p’ariba di brug, nan a wak un oportunidad unico pa organisa e evento informativo aki.

“Mi a cuminsa cu p’ariba di brug, mi ta stage p’ariba di brug y p’esey nos a scoge e scolnan p’ariba di brug prome y e pensamento eigenlijk ta cu esaki lo sigui pa pabao di brug tambe y mi ta hopi satisfecho cu tur e scolnan a presenta”, Dijkhof a expresa.