Diasabra na Xcess ballroom na Paseo Herencia di 7 or te 10 or lo tuma luga evento di Fundacion Artistar pa hoben y mucha cu kier demonstra nan talento artistico. E fundacion kier mustra importancia pa desaroya arte bou di hoben cual nan ta haya ta mesun importante pa e pais cu desaroyo den enseñansa.

Presidente di Fundacion Artistar, Bertha Wolff Croes hunto cu Dilailah Croes, kende ta tesorero di Artistar a comparti cu tur cos ta cla pa actividad cu nan ta bay haci pa sigui duna sosten na e hoben y pueblo di Aruba.

Wolff ta pidi pa publico apoya cada participante cu lo demostra nan talento, cu un actividad asina pa hoben mustra atencion debido riba escenario y pa henter comunidad di Aruba. E fundacion ta serio den cumpli cu e talento.

E ta expresa cu hoben mester di atencion den canto, baile, teatro y arte visual. “Esey ta e meta grandi cu nos tin di cuminsamento di organisa manera otro aña nos lo haci e pop fest y pop art di nos hoben.”

Segun Woff, despues di festival diasabra, lo tin e pop art, cu lo ta un presentacion den baile, grupo, teatro, arte visual y mucho mas. Unda cu tur por haya e oportunidad di participa. Lo cuminsa 11 di augustus cu e preparacion pa otro aña. Nan a acerca cierto instancia pa splica e plan di fundacion.

Amor pa cultura, folkloor y tur loke ta canta ta importante pa un pais, segunWolff. Un hoben mester forma pa su estudio pero ‘tambe forma cu arte y e don cu a nace cune’ pa sigui desaroya y representa su pais.

‘Musico di Aruba birando famoso, pero hubentud no ta domina instrument’
“Nos mester desaroya nos mes den cultura. Nos ta haciendo esfuerso pa logra nos meta y plan pa produci musico pasobra Aruba su musiconan ta birando grandi y tin scarsedad den nos hoben pa domina un instrument of musica. Pa motibo di scarsedad, nan ta haya di nan mes pa aporta actividad y logra nan plan.

Croes a splica cu di e 20 hoben/ mucha cu lo participa lo bay saca 3 ganado den cada categoria. Lo tin diferente premio. E dos categoria mas chikito cu hubenil lo haya instrument. Pa locual ta trata categoria di 18 pa 25 aña lo tin 500 florin pa prome luga, 300 florin pa di dos luga y 200 florin pa di tres hunto cu nan trofeo. Apart di par di regalo mas chikito, ta bay tin diferente premio individual manera di paña y performance.

Mayor di un di participante a bisa cu ta gradici cu Wolff y e fundacion pa duna oportunidad na hoben ‘en special na esnan chikito’ cu nan por expresa nan talento y loke nan tin pa duna, mirnado cu no tin mucho cos di haci durante temporada di vakantie.

“E ta importante como mayor pa apoya e futuro di artista di mañan pa nan sigui haya e curashi pa participa y nan tin gana pa cualkier otro festival cu organisa”, e mayor ta expresa.

Sydney Simoons, kende ta un partipante den categoria grandi,a dicidi di participa pasobra e ta wak cu ta importante pa sigui engrandece ‘nos talento di Aruba’. Segun Simoons un evento asina, lo motiva mas hoben pa participa. “E ta bon cu tin un fundacion interesa pa yuda desaroya den talento no solo vocal pero instrumental tambe.”

E festival lo tuma luga diasabra awo na Xcess ballroom na Paseo Herencia for di 7pm te cu 10pm. Entrada ta 15 florin. Carchi obtenibel na Ritz Savaneta, Boulevard Boutique Keyla Paradera, Dilailah Beauty Clinic y Shahai Take Away Santa Cruz.