Prome minister Evelyn Wever-Croes a informa ayera durante un conferencia di prensa tocante e reforma fiscal y e encuentronan cu nan tabatin cu e gremionan den ultimo dianan.
El a duna di conoce cu siman pasa minister di Finanzas Xiomara Ruiz Maduro y su persona a organisa un encuentro cu e gremionan pa por papia riba e reforma fiscal; tocante esaki el a bisa cu e tabata un reunion hopi positivo y cu nan a trece nan preocupacionnan dilanti.
Wever-Croes a señala cu den e encuentro e gremionan a presenta 20 proposicion y cu gobierno ta trahando ariba esakinan. Por lo tanto no tin un decision riba esey, pa motibo cu gobierno despues di scucha e gremionan kico nan ta pensa, aworaki nan ta evalua e informacion cu a ser haya di e gremionan pa asina gobierno por dicidi con nan ta bay sigui.
“Nos tin un responsabilidad cu e pais aki y e responsabilidad ta pa pone e pais financieramente bek riba bon caminda,” el a expresa.
Tambe minister Wever-Croes a comenta cu nan tin cu tuma cierto decision y cu lamentablemente no ta bay tin medida suficiente riba e mundo aki pa paga e debe cu gobierno anterior a laga y cu no mester busca solucion den esey so.
El a expresa cu ademas nan ta buscando e solucion financiero den un combinacion di desaroyo economico, cu lo genera mas beneficio pa gobierno tambe, y cu e entradanan cu mester bin na un forma mas husto y senciyo, pa cual e reforma fiscal lo ta e instrumento.
E aña aki gobierno mester yega na un deficit di alrededor di 25 miyon florin (-0,5% di GDP), y otro aña esaki mester ta un surplus di 25 miyon florin. Banda di esey e intencion ta pa crea un miho sistema di impuesto, mas husto y mas senciyo pa un y tur.
