Historia ta keda marca na Aruba, unda cu pa prome biaha nos pueblo ta conoce un formador femenino y tambe locual ta mustra cu nos lo tin e prome hende muhe manera minister president.

Durante ora di ayera tardi, gobernador Alfonso Boekhoudt a nombra sra. Wever- Croes como formador y di biaha a dun’e  tarea pa forma un gobierno amplio cu partidonan MEP, POR y ReD. Desde banda di partido MEP, por a nota un tipo di celebracion riba Facebook, unda sostenedonan di e partido a duna pabien na nan lider. Bon Dia Aruba a purba tuma contacto cu sra. Wever-Croes pa un reaccion pero te na momento di cera nos redaccion no a logra esaki y a comprende for di un di su man drechi cu el lo ta den un reunion importante. Tambe nos a tuma contacto cu lidernan di partido POR y ReD kendenan lo mester ta parti di e gobierno di coalicion proximo.

Reaccion POR
E lider di partido POR Otmar Oduber ta bisa cu e ta kere cu tur cos ta den liña cu locual a ser papia tanto cu e informador como tambe gobernador di Aruba. E ta wak cu e proceso nobo aki ta uno positivo ya cu ta habri caminda pa papia directamente cu otro y no pa medio di un tercera persona, cual tabata un di e peticionnan tambe di partido POR na gobernador.

Sr. Oduber ta splica na Bon Dia cu tin hopi cos en comun cu e tres partidonan, principalmente riba e parti humano. E ta sigui bisa cu claramente tin puntonan cu bo ta den desacuerdo cu otro pero e no ta mira e punto nan ey manera algo cu lo stroba un eventual programa di gobernacion. “Den e formacion aworaki mester bay papia di e inclusion of exclusion di partinan di programa cu no ta compatibel cu otro”, e lider di POR ta bisa. E ta kere cu na e momentonan aki e porta ta habri pa un gobernacion di base mas amplio, aunke cu tin un punto specifico (legalisacion di cannabis recreacional) cu partido ReD tin cu ta algo “definitivamente inaceptabel pa partido POR”. Sr. Oduber ta bisa cu e ta tema cu den tur debate a keda riba e mesun punto, riba cual nan ta kere cu pueblo no ta cla pa un stap asina grandi y cu ora e momento yega, e lo mester bay pa medio di un referendum.

E ta sigui splica cu kisas tin puntonan cu e otro partidonan tambe ta den desacuerdo cu POR y mester simplemente papia esaki cu otro. “Aworaki tur cos ta bira un negociacion caminda ya tur tres partido a mustra nan disponibilidad di yega na otro pa un gobernacion solido.”

POR lo keda mantene e protocol firma, esta cu esun cu mas voto ta drenta parlamento pero aworaki mester warda prome pa finalisa e parti di formacion pa asina wak ken lo carga cua posicion.

Reaccion ReD
Ricardo Croes, lider di partido ReD ta bisa cu pa nos na Aruba e ta un procedura normal cu e persona cu ta bira formador ta e lider di e partido mas grandi den oposicion cu ta bay forma un coalicion, dus e ta un desaroyo cu nan tabata spera caba. E ta sigui splica cu ya caba a sinta cu sra. Wever-Croes den un forma informal pa dialoga riba diferente punto di campanja. Tambe el a sinta cu lider di partido POR y cu candidato Andin Bikker, cada un separa y ambos biaha informalmente. Sr. Croes ta bisa cu no a haci ningun tipo di negociacion ainda.

Pa e lider di ReD e ta un oportunidad unico cu e partido ta haya pa forma parti di un gobernacion, cual nan lo haci tambe ya cu nan ta kere esey ta loke nan sostenedonan lo spera di nan tambe. Riba e pregunta riba e tema di cannabis recreacional, sr. Croes ta splica cu na niun momento ReD a pone ningun punto di exigencia riba mesa. “Lo contrario, mi a declara varios biaha cu nos no tin niun exigencia, esaki ta inclui tambe pa e tema di legalisacion di cannabis recreacional”, ta su comentario na Bon Dia Aruba. Pues pa e lider di ReD, e ta duidelijk cu no lo pone legalisacion di cannabis recreacional manera un exigencia tampoco di gobernacion.

“Nos mester goberna cu locual nos a campaña cu ne”, tab

 

ata palabranan di sr. Croes, referiendo na e punto cu tur partido a campaña cu legalisacion di cannabis medicinal. Sr. Croes ta splica cu e acuerdo di gobernacion pa e gobierno di coalicion na Hulanda, ta contene legalisacion en general, pa cual e ta haci e pregunta, ‘nos tin cu keda atras atrobe?’ Desaroyo mundial, a base di economia y medicina ta incluyendo legalisacion medicinal y recreacional. Den nan tin paisnan manera Puerto Rico, Jamaica y Merca, segun sr. Croes. E ta sigui bisa cu na 2013 paisnan miembro di CARICOM a reuni y un di e temanan tabata pa stimula legalisacion ya cu tin riba di 25 mil producto cu por wordo produci for di cannabis y/of hemp.

Sr. Croes ta finalisa bogando na partidonan POR, MEP y tur otro partido pero tambe na comerciantenan pa pone atencion na desaroyonan mundial paso ‘nos no por sigui pisca patras di e net’.

Nota di redaccion: potret di sra. Wever-Croes y sr. Croes ta di encuentro na Universidad di Aruba. Foto sra. Wever-Croes y sr. Oduber ta cortesia di Solo di Pueblo.