Den un conferencia di prensa dialuna merdia, lider di partido MEP, Evelyn Wever Croes ta comenta cu berdad normalmente den diferente parlamento na mundo hende ta bringa cu otro, pero cu si Aruba kier pretende di ta un pais desaroya
y supuestamente 5 strea, ta inaceptabel pa permiti e tipo di agresion nan aki riba dje
sin duna esaki su debido atencion pa locual ainda pueblo ta spera un splicacion.
sra. Croes ta splica den su conferencia di prensa cu no tin tempo pa e investigacion aki tuma asina largo, reunion nan ta continuando y despues di e incidente na parlamento mester para anto refleciona pasobra trabao no por sigui manera semper sin duna e caso aki su debido atencion. ”Laga nos corda un cos bon, tur caminda na mundo cu parlamento nan ta pleita cu otro, ta oposicon cu coalicion ta bringa cu otro, aki na Aruba nos tin un algo nobo. Akinan ta cualicion cu cualicion ta pleita cu otro, parlamentario nan cu ta sostene y ta parti di e mesun partido. Pesey mi ta bisa, kisas e ta un custumber pa haci esaki awo pero bay haci esaki na bo cas y no den cas di pueblo” , sra. Croes ta bisa.
sra. Croes ta agrega cu ya nos ta habriendo e di dos siman desde cu a pasa e agresion
den parlamento y nada no a pasa pa trece clarificacion. ”Un drama total cu a berguensa henter
nos pais y lamentablemente nos ta aworaki nan dos siman mas leu y nada a sali afo” , sra. Croes ta bisa.
A entrega carta mas di 1 siman pasa
sra. Croes ta splica cu esaki no por keda sin accion, pues a entrega un carta mas cu 1 siman pasa
caba na gobernador di Aruba, presidente di parlamento y na minister presidente di pais Aruba pa bisa nan cu e cos aki no por keda asina. ”Nos ta urgi den e carta akinan pa nan haci investigacion urgente y informa parlamento di e resultado di e asunto aki pasobra e cos aki no por keda sin sancion”
sra. Croes ta bisa cu ora cu un persona dal un otro na trabao, e ta wordo kita inmediatamente.
Aworaki e ta agrega, cu lantamento di man den sala di parlamento no por haci manera nada no a pasa. ”Nos a mira cu varios integrante di AVP a sali pidi disculpa manera cos cu ta nan a manda nan dos bay pleita cu otro. Nos a mira integrante nan di AVP manda bisa cu trabao ta sigui manera normal. Nos di fraccion di MEP ta bisa, con bo por hinca esaki den bo cabes?” sra. Croes ta comenta.
Te na unda mester sigui soporta
sra. Croes ta comenta cu te unda ta bay sigui tolera y soporta e tipo di actitud y comportacion
den parlamento. ”Ta morto mester cay den parlamento pa e ora hende dicidi cu mester tuma otro accion? Nos ta bisa ta basta. Ya caba tempo cu sr.Herde a falta respet asina grandi na sra. Tromp durante di votacion pa un ley, nos a bisa cu e cos ki no por bay asina. Tur hende a haci manera nada no a pasa anto sra.Lopez mester a tolera esaki. Awo nan a dale un wanta, atrobe e tin cu tolera esaki?” sra. Croes ta comenta.
sra. Croes ta bisa cu e sala di parlamento tin cu wordo respeta y ta pesey ta urgi gobernador di Aruba , presidente di parlamento y minister presidente di Aruba cual ta e tres persona clave den esaki, pa permiti parlamento pa haya resultado di e investigacion pasobra asina dificil tampoco e no por ta pa haci e investigacion aki lihe pa asina por cuminsa tuma accion.
”Nos kier pidi un debate pa nos debati riba esaki pa weita ken tin cu carga su responsabilidad,
pero tambe pa nos mira pa e cos aki no pasa nunca mas, sea nos mester cambia reglamento di ordo, bin cu un codigo di conducta , nos mester bin cu algo pasobra manera cu e situacion aki ta nos no por sigui” .
Parlamentario Chris Dammers ta conta Bon Dia cu e caso aki ta bao investigacion ainda anto e no por comenta nada riba esaki pasobra e por causa daño na e investigacion.
