Segun un comunicado di gobierno, Aruba completo por mira e exito di participacion di Prome Minister Evelyn Wever-Croes den e e-Governance Conference 2019 na Estonia. Na momento di a acepta e invitacion pa participa na e conferencia aki como un orador y panelista, Wever-Croes a sigura pa tin varios reunionnan riba su agenda durante su estadia corto na Estonia. Di e manera aki, Premier di Aruba ta probecha cada biahe cu e haci pa trece resultadonan grandi bek pa nos pais.

Reunion cu Minister di Foreign Trade y IT
E ultimo compromiso oficial na Estonia di Wever-Croes, el a reuni cu Minister of Foreign Trade and Information Technology, señora Kert Kingo.

Wever-Croes a comparti e vision di Gobierno di Aruba riba diversificacion economico: Creacion di un sociedad di ciencia y tecnologia basa riba conocemento, y economia lo ta e herment pa garantisa innovacion na Aruba y garantisa tambe e competitividad di Aruba su economia, y e internacionalisacion di negoshi. Pa e motibo aki, ‘Knowlegde Economy’ ta un di e sectornan prometedor di Aruba, y nos ta habri pa oportunidadnan comercial den e tereno aki. Sea ta conocemento, servicionan of educacion, den e ultimo caso aki, programanan di intercambio di studiante manera nos facultad di SISSTEM.

Ambos Prome Minister, como Kingo, a expresa nan deseo pa explora colaboracion nobo entre e dos paisnan. Pa Gobierno di Aruba, e meta semper ta pa pone e ser humano central. Y pa esaki ta importante pa logra un plataforma di e-Governance fuerte. Como un pais chikito den region, Aruba ta determina pa logra esaki pa sigura miho servicio na tur ciudadano y mas ainda, trece transparencia den e aparato gubernamental.

Reunion cu Chief Information Officer
“Nos Gobierno su vision ta pa cambia e falta di confiansa den nos institucionnan, nos tabata kier a gana e confiansa di nos hendenan bek.

Pa e motibo aki, nos ta pone integridad como prioridad riba nos agenda politico. Pero pa priorisa Bon Gobernacion y Integridad den Gobierno, no ta bin sin su reto y limitacionnan”, Wever-Croes a accentua den su reunion cu ‘Chief Information Officer’ di Gobierno di Estonia, señor Siim Sikkut.

Sikkut a expresa cu nan a haya informacion positivo di Aruba y cu nan ta mira cu nos ta serio den innovacion, y Gobierno di Estonia ta dispuesto pa yuda nos realisa e metanan di e-Government.

E burocracia cu tin den nos servicionan publico ta obstaculisa nos facilidad pa haci negoshi, como tambe e servicio cu nos ta brinda nos ciudadanonan. Gabinete Wever-Croes tin un compromiso pa implementa e-Government. Esaki lo no ta posibel si nos haci’e riba nos mes. Aruba ta confia riba e experiencia y conocemento di otro paisnan, manera Estonia, cu tabata exitoso cu e administracion electronico den e sistema gubernamental.

Den tur esfuerso di Gobierno pa aumenta transparencia y integridad, Aruba lo establece un ekipo di e-Government cu e proposito pa implementa e ‘eGovernment Road Map’. Den esaki, nos lo sigui traha cu e Academia di e-Governance (eGA) di Estonia. Basa riba conseho di eGA, pa e siguiente 3 aña, nos lo concentra riba nos marco legal, I.D. digital y desaroya nos version di e ‘X-road’, cu ta e plataforma cu ta permiti nos comparti data den un manera sigur y eficiente.

Pa loke ta trata siguridad cibernetico, Aruba a establece un comision cu e tarea pa produci un ‘road map’, supervisa leynan y legislacion, desaroya principionan di un siguridad cibernetico. Den e area aki, ainda Aruba mester mas sosten y conocemento. Tin un ‘gap’ grandi tanto den e parti financiero como tambe den e parti di personal. Pa e motibo aki, tur ayudo cu nos por ricibi, sea asistencia tecnico, programanan di intercambio, of ayudo financiero tambe, tur ta bon bini.

“Aruba ta hopi satisfecho cu e sosten cu e ta hayando di eGA y lo desea di sigui traha hunto cu Estonia den e implementacion di e vision di Gobierno di Aruba. Considerando tambe cu Aruba ta un isla chikito, e cooperacion aki entre Aruba y Estonia por bira un storia exitoso di exportacion di conocemento pa Estonia. Gobierno ta convenci cu e-Government lo brinda miho servicio na tur ciudadano como tambe contribui na desaroyo economico. Na final di dia, loke cu nos ta desea ta pa mehora calidad di bida di tur ciudadano a traves di e-Government”, Wever-Croes a duna di conoce.