Ayera prome minister Evelyn Wever-Croes a duna di conoce cu siman pasa e tabatin comunicacion telefonico cu presidente interino di Venezuela, Juan Guaido, pa loke ta trata e situacion actual di Citgo.
Manera tur hende sa, Guaido ta e persona encarga pa loke ta trata asuntonan di Citgo di parti di Venezuela. Tocante esaki Wever-Croes a splica cu e rumbo den cual e situacion cu Citgo ta bayendo no ta bon, el a bisa cu e ta totalmente contra e manera cu nan ta pretende di bay, sin regla e asunto bon.
“Aruba a sufri hopi bao impacto di e crisis na Venezuela caba pa nan por tene e pilar economico secuestra y esey no ta husto,” Wever-Croes a manifesta. Riba esaki Guaido a duna como contesta cu e ta agradecido na Aruba pa saca un man y yuda esunnan cu ta huy di Venezuela y a bin Aruba.
Wever-Croes tambe a menciona tocante esaki cu mester di un pilar economico pa yuda hende haya trabao y pa e hendenan di Venezuela tambe por haya trabao aki.
Segun Wever-Croes, Guaido a priminti pa papia cu e hendenan di Citgo pa nan percura pa regla tur cos bon; tin un bon relacion entre nan grupo (di oposicion) y Reino, y desde e momento ey e situacion a bira miho. “E siman aki ta un siman tenso, cada dia por pasa algo y lo mi keda informa pa boso ta na altura di loke ta sucede.”
