Durante un conferencia di prensa, prome ministro Evelyn Wever-Croes (MEP) a papia tocante sugerencia di organisacion internacional cu kier yuda cu e crisis di migracion Venezolano, y yudansa di marina real.
E mandatario a splica tocante e palabra di David Smolansky, coordinado di Organisacion di Estado Americano (OEA) pa e crisis di migrante y refugiado. E ta bisa cu nan ta aprecia cu organisacion tin sugerencia, conseho y idea cu nan ta duna, ‘pero nos ta bisa nan, bin cu placa y nos ta hacie na boso manera’. Wever-Croes ta splica cu OEA a sugeri pa bin cu maneho di registracion manera Trinidad & Tobago.
“Nos no ta bay haci esey. Nos ta haciendo otro cos pa un miho bista di cuanto persona tin aki sin cu nan tin documento. Migracion internacional ta uza un suma, y lo wak si e ta sali den nos sistema e cantidad”, e mandatario a expresa.
Pa locual ta trata e cooperacion cu marina real, el a remarca tocante e boto cu a drenta 2 siman pasa, cu a hende a drenta cu nan carga. El a bisa cu esey ta nifica cu no ta exitoso completo den proteccion di frontera. Tocante esaki, el a bisa cu prome por a scucha critica contra e proposicion. Sinembargo, Wever-Croes ta bisa cu e no por imagina un situacion unda no kier mas proteccion. “Nan ta preparando pa yuda nos cu personal y miho ekipo, pa asina nos por ta miho prepara. Mas asistencia den costa, cuerpo policial, y marina real un banda.”
E mandatario a agrega cu e ta wak cu mester ayudo suficiente pa controla. Tur departamento ta trahando sumamente duro, pero pa enfrenta un impacto asina grandi mester tur yudansa cu por haya. Nan tin mas hende y ekipo, ‘no ta wak problema’. Pa finalisa el a bisa cu e meta ta pa Aruba ta un pais sigura.
