No por presenta un plan multiannual pa DOW pasobra no tin fondo. No por ni planea construccion di caminda na 2022 ainda, pasobra Pais Aruba no tin e medionan pa inverti den e fondo di caminda.
Tampoco por bisa kico ta e decision riba UTV/ATV pasobra mester reuni cu stakeholders atrobe. Asina Prome Minister Evelyn Wever Croes, Minister di Infrastructura a bisa ayera durante e reunion di tratamento di presupuesto di DOW.
Mr. Wever Croes a reacciona asina riba e ponencia di oposicion cu a haci hopi pregunta riba cua ta e plannan cu tin riba termino largo. Particularmente fraccion di AVP kier un plan asina.
Banda di e topico di caminda, locual mas tabatin pregunta riba dje ta e problema di e planta di purificacion di awa, RWZI, na Bubali. Mayoria pregunta tabata riba e problema serio aki, ademas cu e topico di UTV/ATV tambe a haya atencion, particularmente di parti di fraccion di MAS.
Prome Minister Evelyn Wever Croes a remarca cu e tabata contento di a mira cu oposicion tabata completo na principio di e reunion y a gradici pa e reunion maratonico, y e mas di 100 pregunta cu el a ricibi.
Infrastructura ta esencial pa e balans cu Gobierno ta buscando, Prome Minister a bisa. “Aruba ta para na crusada importante, unda ta saliendo di e efectonan mas devastador di pandemia y e enfasis ta riba recuperacion. Nos no kier ‘bounce bek ‘sino ‘bounce forward’ pa ta miho para prome cu COVID,” mr. Wever Croes a comenta. “Tur miras ta riba desaroyo economico cu ta bay crea cupo di trabou pa crea progreso, sali di problemanan di financiero. Ta danki na desaroyo economico lo por mehora cuido, siguridad y infrastructura ta parti di e desaroyo aki.”
RWZI
A duna informacion riba procesonan na DOW, peticionnan cu ta trata y e intencion pa mehora e servicio pa medio di digitalisacion. Pero e punto mas preocupante ta keda e planta di purificacion di awa na Bubali cu a ricibi 3.8 miyon pa soluciona aspectonan di emergencia cu ta entre otro e molester di holo y molester di sangura, entre otro.
E trabounan pa soluciona e aspectonan critico ta conclui den e prome kwartaal di 2022, pero esey no ta nifica cu a soluciona e problema grandi. Realidad ta cu e planta ta traha pa 4000 meter cubico di awa sushi, pero awor ta trata dos biaha mas hopi cu esey, y falta mas camber di hotel y condominio pa keda conecta na dje.
Awor caba por bisa cu hotelnan ta contribui na 65 porciento di locual e planta na Bubali mester procesa. Ya na 2018 a reuni cu AHATA riba e aspecto aki pa e RWZI na Bubali pero awor lo bolbe acerca e sector hotelero pa mira con nan por carga cu nan parti mirando cu mester di un planta nobo pa por procesa e awa sushi. E intencion ta pa na final, sigui haci uzo di e awa aki mas eficiente posibel, pa asina no solamente e canchanan di golf, sino hasta cunukeronan lo por haci uzo di e awa despues. Locual ta di mas ta sigui bay den e plas cu ta un area natural. E Minister encarga cu Infrastructura a splica cu awor e planta ta trata e awa sushi, pero den futuro ta bay den e sistema di recupera e awa y di e forma aki traha segun economia circular. “E planta ta uno di DOW, pues ta cay bou Infrastructura pero e plas mes ta cay bou Naturalesa,” Wever Croes a bisa, pues Bubaliplas y su retonan ta keda comparti entre Minister di Naturalesa y su persona. “Pero tin bon colaboracion entre e Ministerionan.”
Pero ademas di e planta na Bubali, tin otro dos RWZI, uno na Zeewijk y e otro na Partkietenbos. E planta na Zeewijk tambe ta pasando den reparacion y apenas ta trahando na 10 porciento di su capacidad. “Ta trahando riba dje.” E planta di Parkietenbos si ta trahando segun tur norma.
Parkietenbos
Papiando di Parkietenbos, Prome Minister a bisa cu a haci e ultimo test riba e incinerador, y si tur cos sali bon, e lo drenta den funcion completo entrante prome di November, y lo kima e slib cu ta bin di Bubali, carcas di animal y tambe sushi medico. “ Pa loke ta dump mes, segun Prome Minister, e plan ta pa elimina e candela y huma cu ta molestia e bario y bin cu un maneho integra cu un solucion mas efectivo pa deshaci di desperdicio. Ta un proyecto cu ta trahando riba dje y kier trece e solucion pronto na Parlamento. E reto di DOW ta keda e camindanan, pa cual te awor no tin placa. E caminda dilanti di hotelnan grandi por ehempel, mester di reconstruccion pero esey so ta costa seis miyon florin. “Y nos no tin e placa ey awor.” Pa loke ta e retonde na Palm Beach, e destaho publico ta cera November y e proyecto mester keda cla na Mei 2022, y mientrastanto a pone diferente asina yama ‘verkeersplateaus’ pa regula e velocidad.
ATV y UTV
Papiando di regulacion di velocidad, lider di fraccion di MAS, Marisol Lopez Tromp a haci diferente pregunta riba decision di Gobierno riba UTV/ ATV. E Parlamentario a referi specificamente riba e rapport cu e comision bou liderazgo di DOW mes a entrega na Gobierno. E rapport aki ta cla y e Parlamentario tabata kier sa kico ta pensamento di Gobierno. Pero Prome Minister Evelyn Wever Croes no a haya prudente pa bisa algo di e rapport mirando cu ta trata di un proposicion na Gobierno y cu ainda mester delibera cu e stakeholders cu ta e doñonan di e companianan di tour. “E reunion lo sosode pronto. Mi kier pa doñonan di curpa keda informa prome cu anuncia den Parlamento pasobra no tin decision ainda. Tin un cuadro. Awor ta bay discuti e cuadro, scucha nan input y e ora bolbe Conseho di Minister. Ora tin a maneho completo, e ora si lo bolbe Parlamento pa informa.”
Pero e Parlamentario di MAS no a acepta e contestanan aki, y den e di dos tanda a bisa locual e kier tende ta e pensamento general di Gobierno riba UTV/ATV y cu si Gobierno ta considera importante pa informa turistanan kico ta permiti y kico no, manera tur pais ta haci. Tur dia tin daño structural na naturalesa y mas dia cu tarda cu regulacion, mas destruccion tin y mas accidente. Marisol Lopez Tromp a puntra cu si ta esaki ta locual Gobierno kier. Mi a yega di expresa cu e vehiculonan aki no ta pertenece riba caminda publico. A pasa un aña y cartera tabata den man di Minister Presidente y no a wak ningun anuncio cu algo a cambia. Ta spera cu rapport no keda na palabra, pero cu ta yega na ehecucion cu control. No ta un trabou facil, pero mester sosode. Aruba ta e unico pais cu ta permiti den nomber di turismo cu ta permiti cu ta keda daña e tiki cu nos tin cu mester cuida pa futuro.” E Parlamentario a bisa cu e tin e consehonan di Comision Flora y Fauna y tambe e pensamento di AHATA. “E ta un ‘free for all,’ pasobra cierto grupo berdad ta gana placa, pero a costo di otro.”
Mester bisa cu miembro di fraccion di MEP Hendrik Tevreden tambe a expresa preocupacion pa falta di regulacion riba UTV/ATV pero ta kere cu mester por yega na un balans.
Prome Minister di su banda a bisa “nos ta tene nos deliberacion y dialogo na mesa. Mi no ta kibra trabou di e comision. E vision di Gobierno ta cu e situacion actual cu UTV/ATV ta causa destruccion na naturalesa y no por continua. P’esey ma bin cu e comision. Pa para e destruccion, pero toch pa yega na balans.” Mr. Wever Croes a bisa cu algun tipo di turista ta aprecia e tipo di actividad aki y cu tin hopi hende ta depende di turismo. Consecuentemente mester bin cu un maneho balansa. Mester bisa cu durante e reunion a presenta un total di 10 mocion, tanto di MEP hunto cu Raiz y tambe di parti di AVP. A pasa pa votacion, sin cu e Parlamentarionan a motiva nan pensamento.
