Desde cu Prome Minister Evelyn Wever-Croes a yega Estonia diadomingo, e tabatin diferente reunionnan di hopi importancia, y na unda cu el a laga bon impresion di Aruba atras cerca tur esunnan cu kende el a hiba combersacion.
Wever-Croes diamars mainta a reuni cu Kersti Kaljulaid, kende ta e prome presidente femenino di Estonia y e mas jong, eligi na october 2016. President Kaljulaid y Wever-Croes ta comparti mesun pensamento, cu innovacion y e-Governance ta e direccion cu paisnan mester bay.
Kaljulaid a informa Wever-Croes di e trayectorio impresionante di e-Governance na Estonia y e aceptacion y dedicacion di pueblo di Estonia pa innovacion crece di tal forma cu awe, Estonia ta lider mundial den digitalisacion y e-Governance.
Despues di e reunion, Wever-Croes a combersa cu Kaljulaid un rato y a regal’e un bunita buki di Aruba. Presidente di Estonia tambe tin interes den un cooperacion entre Aruba y Estonia.
Kaljulaid a informa Wever-Croes cu el a lesa e articulo di New York Times di aña pasa titula ‘Aruba, where women lead’ y el a puntra Wever-Croes kico ta e exito di Aruba. Tambe Kaljulaid a referi na e Arubiano Efraim Benita ‘Dave Benton’, kende ta hopi conoci na Estonia.
“Tanto e reunion como e combersacionnan despues cu Kaljulaid tabata hopi impresionante y agradabel. Como hende muhenan cu ta guia un pais, nos tin hopi interes den comun pa pone e ser humano central”, Wever-Croes a expresa.
