Proceso pa formacion di un gobierno di coalicion nobo ta continuando pero na mes momento por scucha cantidad di informacionnan contradictorio riba henter e proceso aki segun miembro di fraccion di AVP, parlamentario Melvin Tromp ta mustra.
Segun sr Tromp den tur declaracion di e lider di MEP, Evelyn Wever Croes, e ta practicamente riba un ambiente di vrijmento cu e lider di POR, Otmar Oduber pa asina e por cumpli cu su soño di bira Prome Minister di pais Aruba. Sinembargo na mes momento por scucha declaracion di otro miembronan di partido MEP den programanan radial y na television, di un situacion totalmente diferente na loke e lider di e partido geel mes ta pretende di mustra. Xiomara Ruiz Maduro den un declaracion fuerte a sigura cu integridad ta sigui di ta un base fuerte pa formacion di e proximo gobierno y a mustra cu esun cu tin cu wordo investiga, lo wordo investiga. Parlamentario Tromp ta mustra aki cu den pasado algun miembro di fraccion di MEP, entre otro su persona, su coleganan Dangui Oduber y Guilfred Besaril, a acudi na Ministerio Publico cu peticion concreto pa inicia un investigacion contra maniobranan di e tempo ey, Minister Otmar Oduber su maneho relaciona cu asuntonan cu lo no ta cuadra cu regla y leynan existente.
Segun sr Tromp, e desaroyonan contradictorio aki no ta solamente limita na e insistencia di e lider di MEP, Evelyn Wever Croes, pa mustra cu tur cos ta bayendo bon y por a scucha Parlamentario Xiomara mustra bon cla cu e proceso caminda tin cu trata di yega na e condicionnan pa forma un Conseho di minister y di otro asuntonan importante, ta bira e etapa mas serio y aki el a mustra cu no por kita for di e situacion cu tabatin prome cu eleccion.
Ya caba por ripara cu den pueblo tin un reaccion totalmente diferente cu loke e lider di MEP ta ilustrando for di momento cu resultado di eleccion a bira conoci, caminda hopi ta esunnan cu ta puntra ta con partido MEP, diripiente lo kier confia y traha cu un lider di POR. Tabata e propio lider di MEP cu a insisti pa tanto Xiomara, Dangui y Guilfred bay Ministerio Publico pa entrega keho contra di e lider di POR den su calidad di Minister di gobierno di AVP y aki parlamentario Melvin Tromp ta mustra cu hasta Evelyne a bin cu
un nomber special pa e lider di POR, esta Otmar y Strawberry pero awor ta mustra cu nada di esaki lo ta un problema pa asina su persona por bira Prome Minister di Aruba.
Sr. Tromp ta mustra cu awor mester trata di aclaria ta kende ta sintando den scochi di
kende, ya cu un banda e lider di MEP ta papia asina bon di e lider di POR pa forma un
gobierno mientras cu den entrevista na radio Xiomara ta papia cu tur cu mester wordo investiga lo wordo investiga manera pueblo ta exigi. Ta notabel cu tin dos coriente na e momentonan aki den partido MEP caminda di un banda tin e lider di MEP cu sosten di Hendrik Croes ta insisti pa forma gobierno cu POR mientras cu di otro banda por tuma nota cu tin e otro grupo cu tin sosten di e lider honorario di MEP, Nelson Oduber, cu ta
forma pa Xiomara y su yiu Dangui, cu no ta mira bentaha algun di traha cu un lider politico cu nan mes a cuestiona y cu pueblo a rechasa segun parlamentario Tromp ta mustra.
