Evelyn Hernández a dirigi pa e clase politico y a pidi pa aborto no ta castigabel pa e codigo penal di El Salvador. E pais Centro Americano tin un di e legislacion mas conservador riba aborto. E muhe aki, di 21 aña, a sufri durante tres aña, despues di ta condena pa 30 aña di prizon pa duna luz un baby sin bida despues di un embaraso causa pa un violacion na man di un integrante di gang.
Pero dialuna 19 di augustus e historia di El Salvador a cambia, ora den un ripiticion di su huicio, e magistrado a dicidi di absolve Hernández di tur castigo y el a keda den libertad. E noticia aki a ser ricibi como un victoria pa ONG y asociacion di muhenan rond di mundo.
Pero tambe a pone den fucu e leynan Salvadoreño, cu casi ta resulta inadecua, pa motibo cu ta prohibi aborto den tur situacion, incluyendo e peliger di morto pa e mama, malformacion di e feto of violacion.
“Awor cu mi libertad, mi ta sinti cu a mi a rebiba y mi plannan ta sigui studia y sigui yuda e compañeranan cu ainda ta den prizon, pa nan tambe ricibi husticia”, e Salvadoreño, kende ta biba na un zona rural di municipio di El Carmen na Cuscatlán, a expresa.
Na april di 2016, Hernández a ser haya riba vloer di su baño yen di sanger. Su mama y un bisiña a dicidi di hib’e hospital y eynan e dokternan a observa cu tabatin evidente señal di parto, pero e feto no tabata t’ey, pa loke nan a denuncia e hoben. Ora polis a drenta den su apartamento nan a descubri cu e feto tabata morto y eynan e problemanan pa Hernández a cuminsa.
