Segun Evelino Fingal, no ta cuestion di ‘celos’

ORANJESTAD – E artista y diseñado di nos biyetenan di florin, Evelino Fingal, no sa pakico Banco Central di Aruba (BCA) no a acerca su persona riba un proposicion pa actualisa di nos biyetenan. E ta haya esaki como un insulto, mientras si BCA a acerca otro y su persona no. “Mi ta puntra, pakico?” el a bisa na e matutino aki.

Na prome luga, nunca el a wordo acerca como autor di e prome serie di biyete den historia monetario di Aruba despues di Status Aparte. Den pasado Fingal ta considera cu su persona a haya un trato sublime di BCA, ‘manera deber ser’. Te hasta na aña 2003, el a wordo contrata pa guia e adaptacion di e biyetenan cu a bin cune pa motibo di siguridad.

E ultimo biaha cu e tabatin contacto cu BCA tabata ora cu su mahestad Willem Alexander a bira rey. Considerando e cambio aki den cas real, logicamente esaki tambe tabata trece un cambio den nos moneda di florin. Como cu Fingal tambe a diseña nos moneda, el a pone su mes na disponibilidad di BCA pa diseña e moneda nobo cu e figura di rey. Fingal a declara cu BCA a laga e sa cu lo tuma contacto cune… te dia di awe ainda e ta wardando e contesta di BCA.

Fingal no ta compronde e actitud di BCA pa cu su persona, mientras cu e por a demostra cu su caliber ta mundial. “Bo tin un hende asina aki na Aruba, anto bo no ta haci uzo di dje,”el a bisa. Ainda e no por compronde e actitud aki.

Competencia y capacidad
Fingal a tuma nota cu un competencia pa e diseño di e biyetenan nobo a wordo haci, pero e no tabata asina transparente manera tempo cu su persona a wordo eligi. E ta haya un aspecto fastioso di henter asunto aki, cu si e ta bin cu cierto cosnan relaciona cu e serie nobo di biyete di florin, no ta pasobra e tin ‘celos’, sino cu su reaccion ta a base di experiencia cu el a pasa aden.

E ta recorda cu e tempo aya na aña augustus 1984, a sali un anuncio den corant no solamente na Aruba, sino otro paisnan bisiña y di nos region. E tabata un convocatorio publico pa busca candidatonan pa traha Aruba su biyetenan y moneda. Tambe Banco Central di Aruba –segun Fingal– tabatin full otro ekipo. E ta haya cu esun cu tin actualmente a demostra cu e serie di biyete nobo, cu nan ‘no tin e capacidad en absoluto’ pa e trabou aki.

Prome cu e proceso a cana pa Aruba tin su propio banco central y su propio moneda, Fingal ta sinti cu tabata existi un atmosfera di orguyo, cuminsando cu Betico Croes mes, esta cu nos propio hende por. E tempo aya esaki a duna Fingal mas curashi pa participa den e competencia aki y demostra cu e por. Tempo cu e tabata trahando riba e prome serie di nos biyetenan –segun el a compronde for di BCA mes– e tabata un di e 150 personanan cu a logra algo asina. “E no ta un cos comun y coriente cu regularmente ta sosode,” el a bisa.

Aunke BCA a informa cu nan a bin cu un comision interno encarga cu implementacion di e biyetenan nobo, Evelino Fingal tin su duda riba con e proceso aki a tuma luga. Segun el a compronde, un grupo di artista pre-selecciona pa BCA solamente por a participa den e competencia aki. Te hasta for di e lista cu a wordo publica di e participantenan, mayoria di nan no ta diseñado grafico, segun Fingal. “Si bo no tin e estudio, bo no por!”, el a bisa.

E no ta contra cu un artista ta participa, pero mayoria di artista plastico no tin e capacidad pa haci un trabou di embergadura di diseña biyetenan representativo di un pais. Normalmente, pa un diseñado grafico yega na tur e elementonan cu mester tene cuenta pa pone den bo diseño, e artista mester pasa door di un buki masha diki.

El a tuma nota cu a wordo bisa cu a bin cu varios tipo di hurado, esta publico, tecnico y artistico. Fingal ta bisa cu ta logico cu na dado momento ‘tocante gusto bo no por tin discusion’. Sinembargo, cu tur respet pa e miembronan di hurado, Fingal a bisa cu nan por tin gusto si, pero e pregunta ta: Si nan tabatin e conocemento pa haci e seleccion aki?

E ta tribi di bisa cu nan no tabata sa kico ta e necesidad pa un diseño di un biyete. Cu tur e consecuencia y reaccion cu e serie di biyete nobo di florin aki a trece dilanti. Segun Fingal mes a haya di compronde cu e mesun diseñado di e serie di biyete nobo di florin ta asina desapunta, cu na dado momento ni el a bay na e presentacion oficial.