Lo evalua pa castiga esunnan cu ta haci uzo di transporte ilegal. Ora cu ta comete un cto ilegal, den e caso ki un taxi pirata, ta ambos partido ta haciendo algo ilegal. Sinembargo aworaki ta e chauffeur so ta haya multa y ta conscientisa e pasahero. Remarcabel ta cu varios persona ilegal ta traha como taxi ilegal y 90% no ta persona Rubiano.
Segun Minister Otmar Oduber encarga cu transporte, reaccionando riba publicacionnan den medio di comunicacion tocante Departamento di Transporte Publico (DTP) e kier a clarifica algo. DTP pa ley ta e instancia di gobierno cu ta controla y vigila e permisonan cu ta wordo duna den transporte publico na Aruba. DTP den su landsverordening no tin e autorisacion pa controla A nummers. Nan no tin e bevoegdheid, ni maske cu nan haya e estudio di BOA. Esaki lo conta pa e controlnan di esunnan cu tin permiso solamente.
Pa loke ta taxi pirata cu auto bus pirata ta responsabilidad di cuerpo policial. Un persona di DTP por constata cu un A number ta kibrando ley door di ta brindando servicio di transporte publico, mescos cu cualkier otro ciudadano. Y asina por ‘tip off’ polis, pa nan despues para e autonan aki y atende cu nan
Control
Segun Sr. Oduber a splica diabierna el a bay presencia e control aki hunto cu DTP y polis pa 2 ora, cu a cuminsa mainta trempan 6or y mey unda cu a detene 7- 9 taxi/autobus pirata unda cu personanan ilegal tabata sea conduci of pasahero di e autonan aki. Den e casonan aki por mira tambe cu ta polis mester actua y no DTP. E dia ey a confisca 3 of 4 auto, pasobra nan no tabatin papel na ordo. Hopi no tabatin seguro y tampoco keuringskaart. Atrobe ta mustra cu den un tempo asina cortico por a detene asina tanto auto cu 2 unidad riba caminda. Segun e mandatario ta splica ora cu para un auto e ta tarda por lo menos 30 minuut pa atende cu nan, depende si takelwagen mester bin of mester detene etc.
Pasaheronan
Esunnan cu ta haci uzo di e servicionan aki por mira cu, di 7 cu a para 4 pa 5 di nan ta sin seguro. Abo cu ta pone bo bida den man di un chauffeur iresponsabel no por ‘claim’ nada den caso di un accidente. Esey kiermen bo ta exponiendo bo bida na peliger di taxi/autobus pirata.
Tin multa pero pa pone multa mester hende pa controla riba esaki. Awor door di e situacion di limitacion di personal cu tin den cuerpo policial, no tin suficiente ‘man kracht’ pa controla e trabou. Por ehempel e 4 – 5 autonan cu a confisca ta autonan cu mester paga entre 1000 pa 1500 florin na boet. Si diabierna mes tabata un ehempel cu por a detene 7 – 9 taxi pirata y ora wak e resultado, mester pone mas atencion na dje, algo cu lo wordo trata cu colega di husticia, Sr. Oduber a bisa.
Actualmente no tin castigo pa e pasahero. Ta mira cu e pasahero tin hopi miedo pa papia. Si no por constata cu e persona a paga, dificil por prueba cu e ta taxi pirata. Segun e mandatario hopi ta bisa cu ta lift nan a haya inicialmente, pero ora splica nan di e acto contra ley of cu e chauffeur ta sin rijbewijs y seguro etc. Splicando nan esey y bisando nan cu no ta bay actua contra nan, nan ta coopera cu informacion y ta bisa pa cuanto tempo tin ora 2 luna ya nan ta uzando e servicio aki.
Tin indicacion cu e personanan aki ta cobra mas cu un bus, na dado momento a constata cu hende ta paga 5 florin pa un distancia cortico, sinembargo nan ta baha e persona te dilanti di bo cas, pero atrobe e ta ilicito. Transporte publico aworaki mes ta na 3,50 florin cu ta e maximo, Sr. Oduber a splica.
Multa pasahero
Den futuro lo por pensa riba multa pa e pasahero pasobra ora cu ta haci algo ilicito ta tur dos partido ta haciendo algo ilicito. E mandatario ta keda enfatisa cu lo actua cu man duro pa kita e taxi pirata nan aki for di caya pa frena transportacion ilegal, Segun e mandatario diabierna pa 90 porciento ta personanan di exterior ta duna e servicio, esunnan cu ta pasahero si ta varia 60 – 70 porciento ta hende di exterior y e resto local.
