Mediador di Gobierno, sr. Anselmo Pontilius a enfatisa cu den e reunion cu el a participa tocante e operador nobo di ex Aura Casino, a wordo pidi cu mester bin un evaluacion profundo den tur su faceta riba mundo di casino, ya cu e actividad aki no ta manera antes.
El a indica cu e sector di casino local tabatin un mercado di clientenan di Latino America pero nos no por desconoce e situacion economico cu Venezuela ta pasando aden. Pero tambe e efecto di e caida of devaluacion di e moneda na Brasil, Colombia , Argentina. Mester evalua con leu e factornan aki entre otro ta afecta un sector di turistanan cu tabatin bin Aruba pa gamble. Por ta nan ta sigui bin pero cu menos placa cu antes pa hunga den casino, el a bisa.
Evaluacion
Tur e puntonan aki Mediado di Gobierno ta haya cu mester evalua hopi di cerca ya cu Aruba tin 13 casino cu esun di ex Aura Casino cu actualmente ta cera y logicamente e competencia entre nan mes ta grandi. “Aunke nos ta haya hopi turista no necesariamente hopi turista a bay hunga placa mas manera antes den casino”, el a señala.
Mediador di Gobierno ta spera cu Asociacion di casino lo percura tambe pa minister di Labor por haya informacion cu a wordo pidi riba e cantidad di trahado cu tin den casino, loke nan ta genera y con nos ta bay atende cu esaki y trata di preveni un tipo di situacion similar na e ex trahadonan di Aura Casino den cual e consecuencia ta dramatico pa e grupo di 44 trahado. Ademas di tur otro instancianan cu e operador anterior di e casino menciona a keda debe.
