Evaluacion pa introduci otro tipo di VUT; Gobierno no ta logrando su meta riba gasto di personal

E suma astronomico aloca den presupuesto di Pais Aruba ta sigui bira e piedra den sapato di gobierno pa por cumpli cu e protocol firma cu Hulanda. Particularmente pa nan por logra un surplus di 25 miyon florin den e concepto di e ley di presupuesto 2020, cu ainda no por a bin cla prome cu dia 1 di september debi na e mesun situacion.

Durante e reunion publico cu a tuma luga siman pasa pa Parlamento controla e prome seis luna di e presupuesto 2019, Parlamentario Shailiny Tromp-Lee tabata un di e Parlamentarionan mas critico cu a bin cu preguntanan cu tabata refleha su preocupacion riba e gasto di personal, y maneho di gobierno pa atende cu esaki, no obstante di ta miembro di e fraccion di coalicion.

Bon Dia Aruba a bin cu algun pregunta cerca Prome Minister, Evelyn Wever-Croes riba e tema di e gasto di personal, teniendo na cuenta cu algun di e preguntanan di e Parlamentario en cuestion no a wordo contesta claramente durante e reunion publico menciona.

A pesar di e instrumentonan cu gobierno ta bin implementa, manera VUT, pa baha cantidad di personal y purba di baha su gastonan, e cantidad a baha, pero e gasto a subi. Sinembargo, si e tendencia ta sigui asina, pa fin di 2019 mester aloca 3.7 miyon florin adicional di loke a wordo presupuesta pa atende cu e gasto di personal di gobierno.

Premier Wever-Croes a declara cu e gasto di personal ta keda e desafio mas grandi di gobierno. E ta haya cu a pesar cu otro componente financiero ta mustra bon, pero riba tema di personal e ta ‘keda hopi riesgoso’ pa nan por logra na final di aña.

“Esey ta un aspecto cu tin mi hopi preocupa, pasobra nos no a logra nos meta riba dje. Y nos lo purba di logr’e cu otro metodonan,” el a bisa.

E tin cu bisa nan ta pendiente pa anuncia otro tipo di VUT. Nan ta evaluando, entre otro, tipo di VUT; un proposicion cu Corsou a caba di introduci pa empleadonan publico cu ta cerca di nan pensioen pa stimula nan ainda mas, pa nan tuma e VUT y uni esaki na e pensioen.

Mientras cu e aña aki e empleadonan publico cu a bay cu VUT, tur Director di departamento sa cu nan no mag di yena e vacatura, ya cu esey ta e regla. El a bisa cu tur asunto di VUT ta den man di un comision y cu gobierno mes no tin nada di haci cune, solamente na momento cu tin cu firma e decreto di retiro.

E asunto aki –segun e prome mandatario– ta trece su retonan cune y constantemente nan ta evaluando e resultado di e instrumento cu nan a institui cu e fin di baha nan gasto di personal. Te hasta nan ta pensando riba mas instrumento pa nan por yega na e meta cu gobierno a propone nan mes.