Ayera na mainta, for di 9or a bati alarma na aeropuerto y cuerpo di siguridad a ordena evacuacion di tur e biaheronan como tambe empleadonan. Esaki tabata pa rason preventivo na terminal di yegada specificamente.
Hendrick Croes, Vocero di Aeropuerto Internacional Reina Beatrix, a ofrece su declaracion pa e medionan local y el a specifica cu a haya problemanan den e sistema di departamento di tur e camaranan di aeropuerto y ora nan a bay investiga e problema aki, a resulta cu sistema di UPS (Uninterruptible Power System) tabatin un fayo cu a ocasiona un explosion y a cuminsa saca gas toxico.
Croes a expresa cu como consecuencia di esaki, aeropuerto a tuma contacto cu Bombero di Aruba y na su yegada nan a cera e area den cual e oficina en cuestion ta situa, pa e gas no por sali. Sinembargo, e gas a sali via sistema di cooling cu tin na aeropuerto.
Como medida preventivo mester a evacua tur persona cu ta den aeropuerto, pero den area di yegada. Esey no tabata conta pa pasaheronan cu tabata na sala di espera pa salida, pa motibo cu no tabatin ningun influencia riba nan.
Di mesun manera, Croes a splica cu bomberonan mester haci nan investigacion, y tocante e vuelonan, el a bisa cu tabatin un vuelo riba pista, unda e pasaheronan mester a warda den avion te na momento cu bomberonan duna e señal pa nan por desembarca sin peliger.
