Agencia Espacial Europeo, y Roscosmos di Rusia ayera cu nan ta posponiendo un mision conhunto planea pa Mars te cu 2022, en parti pa motibo di restriccion riba biahe resultando di e brote di coronavirus.
E mision ExoMars tabata programa pa lansa e aña aki, pero preocupacion tocante posibel problema tecnico ya a curasha ambos agencia pa discuti un retraso.
“Nos kier haci nos mes 100% sigur di un mision exitoso”, director general di Agencia Espacial Europeo (ESA), Jan Woerner a bisa den un declaracion. “Nos no por permiti nos mes ningun margen di eror. Mas actividad di verificacion lo sigura un biahe sigur y e miho resultadonan cientifico na Mars.”
Dmitry Rogozin, cabesante di Roscosmos, a bisa cu e retraso tabata principalmente pa motibo di problema tecnico, empeora pa e brote di coronavirus, ‘cu a laga nos expertonan practicamente sin posibilidad pa procede cu biahe na industrianan partner’.
Meta di e mision ta pa pone un rover riba e planeta cora, pa yuda dermina si tabatin bida na Mars na algun momento. Cientificonan ta spera cu e rover, cual lo conta cu instrumentonan di tecnologia avansa y nombra pa e kimico Britanico, Rosalind Franklin, lo ta capaz di busca pa marcanan biologico di bida bou di superficie Marsiano, y tambe duna mas conocemento riba e historia di awa den e planeta.
E retraso ta otro problema pa e programa ExoMars, despues cu e lansamento na 2016 di un orbiter y test lander. E Trace Gas Orbiter a ser lansa exitosamente, pero e lander Schiaparelli a mal funciona y a crash ripa superficie di Mars, resaltando e dificultad di pone un ‘probe’ riba e planeta.
Te awo, Merca ta e unico pais pa exitosamente aterisa un ‘probe’ cu ta funciona na Mars. Lander di NASA, Curiosity y InSight ainda ta operando riba e planeta.
E otro misionnan Marsiano ta programa pa e berano aki. Merca ta lansando un lander, China tin un combinacion di lander-orbiter, y Emirato Arabe Uni ta mandando un orbiter.
Por manda astronave na Mars unicamente cada dos aña, pa tuma bentaha di e miho alineacion posibel entre Tera y su planeta bisiña.
Hefe di mision cientifico di NASA, Thomas Zurbuchen, a bisa cu ESA y Roscosmos a tuma un ‘decision dificil’ pa retrasa mision ExoMars.
“Lansa y aterisa di forma sigur un astronave riba Mars ta extremadamente exigente y ta rekeri hopi tecnologia y sistema pa traha perfectamente”, el a skirbi riba Twitter.
